Қаржы министрлігінің мемлекеттік кірістер комитеті 2025 жылдың 19 ақпанында 93 блогерге жалпы 9,8 миллиард теңге мөлшерінде салық төлеу керектігін ескерткен. Бүгін комитет бұл хабарламаларды қайтарып алды.
Хабарламаны қайтарып алу себебін “техникалық ақаудан” деп түсіндірді. Техникалық ақау түзетілгеннен кейін, сол 93 блогерге жаңа хабарлама жолдайтынын мәлімдеген.
Бұған дейін мемлекеттік кірістер комитеті 594 блогерге 53,3 млрд теңге төлеу жөнінде хабарламалар жіберген. Блогерлер мен инфлюенсерлердің салық төлемегені жөніндегі ақпаратты қоғам қызу талқылады.
Комитет әлеуметтік желі қолданушыларының 2022-2023 жылдар аралығындағы кіріс есебін дұрыс көрсетпегенін мәлімдеді. Яғни салық декларациясындағы деректермен сәйкес емес.
Блогерлер наразы
Әлеуметтік желілерде салық төлемеген блогерлер тізімі деп көрсетілген құжат көшірмесі тарады. Өз кезегінде блогерлер мен елге танымал адамдар салық органдарының есебі шындыққа жанаспайтынын айтып, әлеуметтік желілердегі парақшаларында ақтала бастады. Олардың кейбірі жеке деректерінің таралып кеткеніне наразылық білдірді.
Тележүргізуші Ләйлә Сұлтанқызы кейінгі 5-6 жылда жеке кәсіпкер ретінде тіркеліп, тиісті салық мөлшерін төлеп жүргенін айтты. Журналистің уәжі бойынша оның банк шоттарындағы қаржы айналымы салық органдары жариялаған сандарға сәйкес келмейді.
Блогер әрі саяхатшы Өркен Кенжебек Салық кодексіне сүйене отырып, ресми хат дайындап жатқанын, осы уақытқа дейін шоттары жабылып, ескерту алмағанын айтады. Оның сөзінше, салық органдары барлық ақша қозғалысын табыс деп қарастырған.
Қаражат айналымының заңды екенін дәлелдейді
Салық комитеті әлеуметтік желілерде 20 000-нан астам жазылушысы бар инфлюенсерлерді бақылауға алып, олардың контентінде кәсіпкерлік нышанның бар-жоғын тексерген. Бұл жөнінде аталған комитеттің жеке тұлғалардың кірістерін әкімшілендіру басқармасының бас сарапшысы Ерсайын Көптілеуұлы түсіндірді.
Орган 2022-2023 жылдардың есебін тексерген. Сарапшы камералды бақылау блогерлерге ғана емес, кәсіпкер ретінде табыс табуды көздейтін және табыс мөлшерін дұрыс көрсетпейтін жеке тұлғаларға қатысты жүргізілетінін айтты. Қадағалау жұмысы үздіксіз жүргізіледі және салық декларациясы мен жалпыға бірдей декларация шеңберінде орындалады. Негізгі мақсат — көлеңкелі экономиканы жою және салық төлеу тәртібін күшейту.
Ерсайын Көптілеуұлының айтуынша, блогерлер кірістің кәсіпкерлік қызмет нәтижесінде түспегенін (мысалы, пәтер сату, ата-анадан алынған қаражат, қайырымдылық немесе жеке мүлік сатудан түскен табыс) дәлелдейтін құжаттары болса, салық міндеттемесінен босатылады.
Сурет: Ашық дереккөздерден
