Депутат Асхат Аймағамбетов үкімет міндетті әлеуметтік медициналық сақтандыру бойынша жарнаны толық төлемей отырғанын айтты. Ол бұл туралы телеграм арнасында жазды.
Депутат азаматтар мен жұмыс берушілер ай сайын жалақының 2% және 3%-ынан жарна төлейтінін, егер төлем жасалмаса, адам медициналық көмектен бірден қағылатын айтады.
«Қаржы министрлігі жарнаны орташа емес, медиандық жалақыдан есептейді. Бұл — заң бұзушылық. Орта есеппен жүйе жыл сайын 250 млрд теңге жоғалтады. 2024 жылы тіпті осы азайтылған жарнаның жартысы ғана төленген. Соның салдарынан денсаулық сақтау жүйесі 2024 жылы 500 млрд теңгеден астам қаражаттан қағылды», — дейді депутат хабарламасында.
Депутаттың айтуынша, медициналық сақтандыру жүйесіне түсуі тиіс қаражат азайғандықтан емханалардағы кезектер көбейіп кетеді, анализ тапсыру мен дәрі-дәрмек алу қиындайды, мыңдаған адам уақытында медициналық көмек алмайды.
«Бұдан бөлек, 15 санаттағы азаматтар бар: зейнеткерлер, балалар, студенттер және тағы басқалар. Олар үшін жарнаны мемлекет төлеуі тиіс. Заң бойынша — орташа жалақының 2%-ы көлемінде», — дейді Аймағамбетов.
Депутат қарапайым азамат жарнаны төлемесе, бірден жүйеден шығарылып, медициналық көмектің тоқтатылатынын сынады. Ал мемлекет өз жарнасын толық төлемей жатса да, ешқандай жауапкершілік қарастырылмағанын айтады.
Орташа жалақы – елдегі барлық жалақының жалпы сомасын қызметкерлер санына бөлу арқылы есептеледі.
Медиандық жалақы – елдегі жалақы мөлшерін төменнен жоғарыға қарай реттегенде дәл ортасында тұрған жалақы. Бұл көрсеткіш орташа жалақыдан әрдайым төмен болады.
Сурет: Орталық коммуникациялар қызметі
