Маңғыстаудағы «ProArt2017» ЖШС күріш пен қарақұмықты арзанға сатып алып, кәсіпкерлерге үстеме ақымен өткізген. ҚР Сауда және тұтынушылардың құқығын қорғау комитетінің Маңғыстау облысы бойынша департаменті әлеуметтік маңызы бар азық-түлікті (ӘМАТ) жоғары бағамен сатқанын заңсыз деп есептейді.
«Тексеру барысында «ProArt2017» ЖШС-ның бірнеше мәрте заң бұзғаны анықталды. 2024 жылдың 12-15 қаңтары аралығында кәсіпорын «Dina Market» ЖШС-нан 5 кг күрішті 2703,57 теңгеге сатып алып, кейін оны «Нефтегазстрой» ЖШС-на 3437,5 теңгеге сатқан. Осылайша рұқсат етілген сауда үстемесі нормасынан 27% асып кеткен.
Сонымен қатар, 2024 жылдың 4-15 қаңтары аралығында «ProArt2017» ЖШС «АНВАР» ЖШС-нан 200 кг қарақұмықты келісін 237 теңгеден сатып алып, оны «Мұнайгазстрой» ЖШС-на келісін 298,9 теңгеден сатқан. Мұндағы сауда үстемесі 26%-ды құрайды», – делінген хабарламада.
Шек – 15%
ҚР «Сауда қызметін реттеу туралы» заңының 9-бабының 1-тармағына сәйкес, әлеуметтік маңызы бар азық-түлік тауарларының сауда үстемесі өндірушінің немесе көтерме жеткізушінің сатып алу бағасының 15%-ынан аспауы тиіс. Заң бұзғаны үшін «ProArt2017» ЖШС-на қатысты әкімшілік іс қозғалып, ескерту түрінде әкімшілік жауапкершілікке тартылды.
Сөредегі баға түрбіртекпен сәйкес емес
Сондай-ақ, дүкен сөрелеріндегі бағалар мен кассалардағы нақты бағалар арасындағы айырмашылықтар жиі кездескен. Мәселен,
- «Анвар» гипермаркеті. 2024 жылдың 27 қарашасында Ақтау қаласындағы дүкенде қырыққабаттың бағасы сөреде 159 теңге, ал кассада 237 теңге болған. Дүкенге ҚР Әкімшілік құқық бұзушылық кодексінің 193-бабының 5-бөлігі бойынша 369 200 теңге айыппұл салынды.
- «Алтын фуд» супермаркеті. 2024 жылдың 17 қарашасында «Borjomi» минералды суының сөредегі бағасы 440 теңге болғанымен, кассада 629 теңгеден сатылғаны анықталды. Супермаркетке ҚР ӘҚБК-нің 193-бабының 4-бөлігі бойынша 55 380 теңге айыппұл салынды.
2024 жылы сауда субъектілеріне қатысты 134 әкімшілік іс қозғалды. Оның ішінде 112 нысанға ескерту жасалып, 13 кәсіпкер айыппұл төледі. Департамент кәсіпкерлерді тауарлардың бағаларының жоқтығына немесе дүкен сөрелері мен касса бағалары арасындағы айырмашылыққа қатысты қатаң бақылау жүргізуді жалғастырады.
Сурет: pexels.com
