2 наурыз күні Маңғыстау облысы Мұнайлы ауданы Басқұдық ауылында бір үйдегі жеті адам газдан уланып, көз жұмды. Бұл туралы Маңғыстау облысы әкімдігі хабарлады.
Үйде қаза болған 7 адамның бесеуі – кәмелетке толмаған балалар. Маңғыстау облысы төтенше жағдай департментінің мәліметі бойынша қайғылы оқиғаға газ жабдықтарын пайдалану ережесін бұзу себеп болған. Қаза тапқандар – Қазақстанда уақытша тұрып жатқан Өзбекстан азаматтары.
Төтенше оқиғаның себебін анықтау үшін комиссия жұмыс істеп жатқанын мәлімдеді әкімдік.
2025 жылдың алғашқы екі айында газдан улану және газға байланысты қайғылы оқиғалар тіркелді. Мәселен, 31 желтоқсаннан 1 қаңтарға қараған түні Талдықорғанда газ балонның жарылуы салдарынан ерлі-зайыпты қайтыс болып, бес бала ауруханаға түсті.
23 ақпанда Маңғыстау облысының Мұнайлы ауданында бір отбасының төрт мүшесі газдан уланып, оның үшеуі қаза тапты, ал біреуі ауыр жағдайда ауруханаға жеткізілді.
Cурет: Pixabay
