Қазақстанның бірнеше компаниясы Ұлыбританияның санкция тізіміне енді. Бұл туралы Ұлыбританияның Сыртқы Істер министрлігі хабарлады.
Санкция тізіміне енген компаниялардан Украинадағы соғыс кезінде Ресей әскери-өнеркәсіптік кешеніне қолдау көрсетті деп күдіктенеді. Олар техника, өндіріс құралдарын және басқа да жабдықтар жеткізді деп айыпталған.
Бұл санкциялар Ресей әскерлеріне қажетті тауарларды жеткізуге тыйым салады. Осылайша, олар Путиннің Украинада бастаған заңсыз соғысы үшін өте қажетті ресурстарды шектейді, — деп жазылған Ұлыбританияның СІМ сайтында.
Бұл тізімде Қазақстаннан бөлек Қытай, Түркия, Өзбекстан және Ливия компаниялары бар.
Компаниялар қандай қызмет атқарады?
- «TawKZ» ЖШС – өнеркәсіпке қажет құрал-жабдықтарға шығарумен айналысады.
- «Рабадазия» ЖШС – көтерме саудамен айналысады, оның иесі – шетелдік азамат.
- Stanex Group компаниясы – өнеркәсіпке қажет жабдықтарды, құрылыс материалдарын жеткізумен айналысады.
- CPS Energy — муниципалды электр компаниясы.
- «Запчасть-Трейд» компаниясы – автомобильдерге арналған бөлшектер мен жинақтаушы бөлшектерді сатумен айналысатын ірі сауда ұйымы.
- «Kazstanex» ЖШС әртүрлі тауарларды сатумен айналысатын ірі сауда ұйымы. Сондай-ақ бұған АҚШ Қаржы министрлігі де санкция салған. Тізімге 17 елден 275 адам мен компания қосылған. Нәтижесінде Қытай арқылы Ресейге станоктар жеткізді деп Kazstanex айыпталған.
Ашық дереккөздердегі мәліметтерге сай бұл компаниялар Алматы, Астана және Өскемен қалаларында тіркелген.
Cурет: informburo.kz
