Ұлттық банк базалық мөлшерлемені 16,5%-ға дейін көтеру туралы шешім шығарды. Банк мұны инфляцияны бақылау және тәуекелдерді азайту қажеттілігінен деп түсіндірді.
Банк мөлшерлеменің көтерілуіне бағалардың өсуі, тұрғындардың инфляцияға қатысты алаңдаушылығы, шетелдік факторлар да әсер етіп жатқанын, әсіресе Ресейдегі бағаның өсуі, елдегі несие беру көлемі тым артып, экономикалық тұрақсыздық қаупі туындағаны себеп дейді.
“Базалық мөлшерлеме бойынша қазіргі шешім болашақта базалық мөлшерлемені одан ары жоғары көтеруге қажеттілігін болдырмау үшін қабылданады. Бұл инфляцияны орта мерзімді келешекте таргетке қарай орнықты түрде төмендеу траекториясына қайтаруға ықпал ететін болады. Төмен инфляцияға қол жеткізу, әлеуметтік экономикалық тұрақтылықты, қаржы секторының тұрақтылығын қамтамасыз ету инвестицияларды тарту, экономиканың тұрақты және сапалы өсуі үшін негіз болады”, — делінген хабарламада.
Базалық мөлшерлеме – Ұлттық банктің негізгі пайыздық ставкасы. Бұл ақша-несие саясатының басты құралы және ол келесі негізгі қызметтерді атқарады:
- Ақша құнын реттейді – Ұлттық банк базалық мөлшерлемені белгілеп, коммерциялық банктерге несие береді немесе олардың депозиттерін қабылдайды.
- Инфляцияны бақылайды – Егер инфляция өссе, мөлшерлеме көтеріледі, ал экономика баяулап жатса, төмендетіледі.
- Несие мен депозит мөлшерлемелеріне әсер етеді – Базалық ставка өскен жағдайда, коммерциялық банктердің несие беруі қымбаттайды, яғни халық пен бизнес үшін несие алу қиындайды. Ал төмендеген кезде, керісінше, несиелер арзандайды.
Сурет: Ашық дереккөздерден
