Лондонның орталық қылмыстық істер сотында Болгария азаматтарына қатысы болуы мүмкін делінген тыңшылық ісі бойынша сот процесі жалғасып жатыр. Прокуратура күдіктілерді Ресейдің арнайы қызметтерінің тапсырмасымен әрекет еткен деп айыптап отыр. Олар алты операция жүргізген, оның екеуі Қазақстанға қатысты. Бұл туралы Азаттық редакциясы BBC-ге сілтеме жасай отырып, жазды.
Айыптаушылардың мәліметінше, 2021 жылдың қарашасында күдіктілер Ұлыбританиядан саяси баспана алған, Қазақстан азаматы бұрынғы саясаткер Бергей Рысқалиевті аңдуға тырысқан. Бұл әрекет Қазақстанның Ресеймен қарым-қатынасын нығайту мақсатында жасалды деп болжанып отыр. Прокуратураның айтуынша, Ресей билігі Қазақстанға «саяси диссиденттерді қудалауда көмек көрсету» арқылы екіжақты қатынастарды жақсартуды көздеген дейді.
Қазақстан елшілігіне қарсы әрекет
Тағы бір эпизод 2022 жылдың қыркүйегінде болған. Күдіктілер Лондондағы Қазақстан елшілігіне қарсы «жалған наразылық акциясын» ұйымдастыруға тырысқан. Бұл акция туралы ақпаратты Қазақстан билігіне беру жоспарланған. Прокуратура мұндай әрекеттердің де Ресей мен Қазақстан арасындағы байланыстарды нығайтуға бағытталғанын мәлімдеді.
Екі күдікті мойындады
28 қараша күнгі сот отырысына Катрин Иванова, Ваня Габерова және Тихомир Иванчев қатысты. Олар өздеріне тағылған айыптарды жоққа шығарды. Сонымен қатар, басқа екі күдікті, Орлин Русев пен Бизер Джамбазов, тыңшылық әрекеттерін мойындаған.
Бергей Рысқалиев кім?
Бергей Рысқалиев 2006-2012 жылдары Атырау облысының әкімі қызметін атқарған. 2012 жылы ол бауыры Арманжан Рысқалиевпен бірге шетелге қашқан. Кейін экс-әкімге «бюджет қаржысын жымқырды және қылмыстық топ құрды» деген айып тағылып, Қазақстан соты оны сырттай 17 жылға бас бостандығынан айырды. 2020 жылы сот отбасының тәркіленген мүлкінің бір бөлігін қайтару туралы шешім шығарды.
Сурет: azh.kz
