Мемлекет басшысы Қасым-Жомарт Тоқаев 11 қаңтарда Парламент Мәжілісінің отырысында Үкіметке утиль алымның мөлшерін қайта қарауды тапсырды.
Бастапқыда жұмыс тобы құрылып, талдаулар жасалғандай болып еді. Оған да төрт айға жуық уақыт өтті. Қоғам арасында утиль алымының көлемі қаншаға азаятыны жайлы қызу талқыланды. Халықта утиль алым 5-6 есе азаяды деген үміт болды. Бірақ 23 ақпан күні бірінші вице-премьер Роман Скляр көлемі 1 наурыздан бастап 50 пайызға азаятынын мәлімдеді.
Осы жаңалықты тыңдаған Орал қаласының тұрғыны Талап Жүсіпқалиев Ресейден жаңа автокөлік алып келеді (суретте).
-1 наурыздан кейін жаңа көліктің құжатын рәсімдейтініме сенімді болдым. Бірақ индустрия және инфрақұрылымдық даму министрінің орынбасары Марат Қарабаев 1 мамырға дейін нормативтік құжаттардағы өзгерістерді енгізетінін айтып, Скляр айтқан мерзімді тағы бір айға созды. «Бірақ біз сәуір айының аяғына дейін заңнама өзгертеміз» деді. Ресейден көлік алған себебіміз, Үкімет мүшелері айтқандай утиль алым 50 пайызға кемігенде LADA GRANTA көлігі Ресейде Қазақстаннан 1,5 млн теңгеге арзан. Наурыздан бері заңнамадағы өзгерістерді күтіп жаңа көлікті рәсімдей алмай отырмыз. Аталған көлікті рәсімдеу үшін қазіргі уақытта утиль алым көлемі – 1 072 000 теңге. Уәде етілгендей 50 пайыз азайса, бұл сомма зейнеткер адам үшін қомақты қаржы. Өкінішке орай, мамыр айы басталса да Үкіметтен нақты шешім жоқ, — дейді оралдық зейнеткер Талап Жүсіпқалиев.
Қостанайда құралған LADA GRANTA ақпан айында 5,3 млн теңге болса, қазір 6,3 млн теңгеден басталады. Бұл – шынайы нарықтық баға. Ал ресми статистика былтырғы бағадан да арзандатып көрсетуде. Мәселен, Koleso.kz порталы 30 сәуірдегі жариялаған шолу мақаласында LADA GRANTA қаңтар айында 3,7 млн теңге болды, қазір 1 млн-ға қымбаттап 4,7 млн.теңге тұрады деп жазады.
Иә, біздің елде утиль алыммен бірге көліктің өзі де біраз қымбат. Ақпан айында LADA GRANTA көлігі Ресейде Қазақстаннан гөрі 25%-ға арзан болған. Талап Жүсіпқалиевтің көлікті Ресейден алған себебі де сол. Зейнеткер адам үшін көлік бағасының 25%-ы, утиль алымның 50%-ы – өте көлемді қаражат. Енді көп жыл жиған-терген ақшасына алған көлік құжатсыз ауласында шаң басып тұр. Утиль алым төленбей көлік тіркелмейді. Оралдық зейнеткер сияқты біраз адам Үкімет мүшелерінің сөзіне сеніп, бар жинағын көлік алуға жұмсады. Енді көліктерінің құжатын рәсімдей алмай, уәде етілген өзгерісті күтуде. Утиль алым көлемін шұғыл шешуді Президент Тоқаевтың өзі тапсырса да, мәселе шешілмей, сиырқұйымшақтанып барады…
Нұрлыбек Рахманов,
басты сурет autonews.ru сайтынан
