Елімізде Cassa Depositi e Prestiti мемлекеттік банкінің несие желісі ашылады. Бұл жайында Қазақстанның Сауда және интеграция министрі Арман Шаққалиев пен Италияның сыртқы істер министрінің орынбасары Эдмондо Чириеллидің екі жақты кездесу барысында мәлім болды.
Арман Шаққалиевтің айтуынша, Италия Еуропалық Одақ елдері арасында Қазақстанның негізгі сауда серіктестерінің бірі болып саналады. 2023 жылы екі ел арасындағы жалпы тауар айналымы 16,1 млрд$ құрады. Бұл өткен жылмен салыстырғанда 7,8%-ға көп.
Қазақстаннан Италияға экспорт 14,8 млрд$-ға жетті, ал импорт 1,2 млрд$ құрады, бұл өсімнің оң динамикасын көрсетіп отыр.
Сауда-саттықтың өсуі осы жылы да жалғасын тапты. 2024 жылдың сегіз айында сауда көлемі 33%-ға өсіп, 13,8 млрд$-ты құрады. Бұл ретте қазақстандық өнімнің экспорты 36%-ға артып, 12,9 млрд$-қа жетті.
Сауда және интеграция министрі Арман Шаққалиев Астанада экономикалық ынтымақтастық жөніндегі Қазақстан-Италия үкіметаралық жұмыс тобының (ҮАК) 9-отырысы өткенін атап өтті. Отырыс сауда-экономикалық мәселелерді талқылауда маңызды рөл атқарады.
«Біздің сауда-экономикалық саладағы қарым-қатынасымыз нығая түсетініне сенімдіміз. Қазақстан Орталық Азияда негізгі орынға ие және Еуропаны өңірмен байланыстырады. Екіжақты сауда көлемі едәуір өсті және біз қол жеткізілген нәтижелерге қанағаттанамыз. Біз Қазақстанда Cassa Depositi e Prestiti мемлекеттік банкінің несие желісін ашуды жоспарлап отырмыз. Екі ел арасындағы қарым-қатынастың дами беретініне сенімдіміз. Бұл кездесулерді өткізу біздің ынтымақтастығымыздың алты жылдық кезеңін аяқтаған маңызды кезең болды», – деді Италияның сыртқы істер министрінің орынбасары.
