Зейнетақы жинағы арқылы жер телімін сатып алу шарттары өтінім қабылдайтын ресми enpf-otbasy.kz порталында көрсетілді.
Енді салымшылар зейнетақы жинақтары есебінен, зейнетақы жинақтары және меншікті қаражат есебінен жеке тұрғын үй сала алады (оның ішінде нысаналы мақсаты жеке қосалқы шаруашылық немесе жеке тұрғын үй құрылысы бар жер телімін сатып алу да бар).
Қаражат алу үшін қажетті құжаттар тізімі:
1) жер телімін сатып алу-сату шарты, айырбастау, жер теліміне меншік құқығын/жер пайдалану құқығын растайтын өзге де құқық белгілейтін құжаттар *(нысаналы мақсаты — жеке қосалқы шаруашылық немесе жеке тұрғын үй құрылысы);
2) жер теліміне жеке меншік құқығы актісі, уақытша өтеулі жер пайдалану (жалдау) құқығы актісі;
3) жылжымайтын мүлікке тіркелген құқықтар (ауыртпалықтар) және оның техникалық сипаттамалары (жер учаскесіне) туралы құжат;
4) жеке тұрғын үй құрылысы жөніндегі құжаттар:
- тиісті лицензиясы бар құрылыс компаниясымен жасалған мердігерлік шарт * (жеке тұрғын үй құрылысының толық аяқталуын көздейтін). Алушы құрылыс сомасының бір бөлігін өз қаражаты есебінен төлеп қойған жағдайда, онда алушының өз қаражаты есебінен ішінара төлеу фактісі немесе төлем фактісін растайтын басқа да құжаттар тіркелген мердігерлік шарттың қосымша келісімін ұсыну қажет;
- құрылыс-монтаж жұмыстарына арналған құрылыс компаниясының лицензиясы.
Мақсатты растау үшін қажетті құжаттар тізбесі (біржолғы зейнетақы төлемдерін алған күннен бастап 24 ай ішінде ұсынылады):
- алушының атына ресімделген, нысанды пайдалануға қабылдау актісі;
- жылжымайтын мүлікке тіркелген құқықтар (ауыртпалықтар) және оның техникалық сипаттамалары (жер теліміне және салынған жеке тұрғын үйге) туралы анықтама.
* жер теліміне құқық белгілейтін құжатта (егер жер телімі біржолғы зейнетақы төлемдері есебінен сатып алынған жағдайда), жеке тұрғын үй салуға арналған мердігерлік шартта біржолғы зейнетақы төлемдерінің көзі, мөлшері және төлеу мерзімдері (әрбір көз бөлігінде) бойынша тармақтың болуы міндетті.
sarapshy.info
