Ұлттық банк 2025 жылдың бірінші жартысында елдегі барлық банктер үшін бірыңғай QR-кодты енгізуді жоспарлап отыр. Аталған жүйе биылғы жылдың соңына дейін пилоттық режимде жұмыс істей бастайды. Бұл туралы ҚР ҰБ Ұлттық төлем корпорациясының басқарма төрағасы Бинұр Жәленов мәлімдеді.
«Биыл біз телефон нөмірі бойынша (және ірі банктерде), ал келесі жылдың бірінші жартысында – бірыңғай QR арқылы банкаралық аударымдар мүмкіндігін қосуды жоспарлап отырмыз. Қазірдің өзінде жұмыс қызу жүріп жатыр» – деп жазды ол.
Айта өтелік, жылдың басында Ұлттық банк басшысы Тимур Сүлейменов Қазақстанда 2024 жылдың соңына қарай бірыңғай QR іске қосылатынын атқан еді.
Ұлттық банк басшысы бұл жүйенің не үшін қажет екенін түсіндірді.
«Бұл бағытта жұмыс істеп жатырмыз. Жүйені бірыңғай QR немесе түрлі банктердің QR коды деп те атауға болады. Бұл мәселенің техникалық жағы. Оңай болу үшін бірыңғай QR десек те болады. Мұндағы идея 100 пайыз Ұлттық банкке тиесілі Ұлттық төлем корпорациясының түрлі банктер қолданысқа шығарған QR-кодтарды өзара оқи алатын жүйе әзірлеуіне құрылған. Дүкенде QR-код арқылы төлем жасағыңыз келсе, Halyk немесе Kaspi бар ма деп сұрайды. Halyk-тың картасымен Kaspi терминалында төлем жасай алмайсың және керісінше. Бұл тұтынушыларға да, банктердің өзіне де қолайсыз деп ойлаймын. Өйткені транзакцияның бір бөлігі кетіп жатыр деген сөз», – деді Тимур Сүлейменов.
Айта өтелік, жүйе туралы 2022 жылдан бері айтылып келеді.
Сурет: freepik.com
