Әйелдерге арналған «Ұмай» ипотекасы 2025 жылы қайтадан іске қосылады. Бұл жөнінде «Отбасы Банкі» АҚ басқарма төрағасының орынбасары Нұрлан Ақшанов әлеуметтік желідегі парақшасында хабарлады.
«Ипотека арқылы баспана алу үшін алғашқы жарна ретінде несиенің 20 пайызын «Отбасы» банкінің депозитінде сақтау қажет. Іріктеу кезінде депозиттегі жинақталған сыйақының көлемі маңызды рөл атқарады. Қатысушыларға кезекте тұрудың қажеті жоқ. Ал пәтерді кез келген қаладан немесе ауылдан сатып алуға болады. Бұрын Астана, Алматы, Атырау, Ақтау қалаларына өтінімдер көлемі бойынша шектеулер болды. Енді бұл шектеулер де болмайды», — деп жазды Нұрлан Ақшанов.
Бағдарламаға кез келген отбасылық мәртебеге ие әйел қатыса алады. Сатып алынатын баспананың шекті құны 30 млн теңгеден аспауы тиіс. Ипотекалық несиенің мерзімі 6 айдан 25 жылға дейін.
Сонымен қатар жобаға қатысу үшін қойылатын кіріс талабы өзгерген. Енді кірістің максималды сомасы – 900 000 теңгеден астам сомаға айтарлықтай ұлғайтылып отыр. Шамамен осы сомаға дейін табысы бар тұлғалар бағдарламаға қатыса алады.
Нұрлан Ақшановтың айтуынша, әзірге филиалдарға барудың, 300 нөміріне қоңырау шалудың не кеңесшілерге жүгінудің қажеті жоқ.
«Ханымдар мен қыздар, осы хабарландыруды оқып, шарттарды талдап көріңіз. Депозитіңізді тексеріп, оны толтыруды ойлаңыз немесе депозит ашып қойыңыз», — деп жазды ол.
Айтып өтелік, «Ұмай» – ресми табысы бар, жұмыс істейтін әйелдерге арналған ипотека. Бағдарлама 2021-2023 жылдар аралығында іске қосылды.
2021 жылы «Ұмай» бағдарламасы басталған кезде, бірінші транш аясында, жалпы көлемі 8,4 млрд теңгеге 954 қазақстандық қыз-келіншек қарыз алды. 2022 жылы 14 млрд теңге бөлінді. Аталған қаражатқа 1 119 бұрымды баспана алып, қоныс тойын тойлады. Ал 2023 жылы бағдарламаға 15,6 млрд теңге жұмсалды.
Сурет: freepik.com
