Түркістан қаласындағы бес ломбард лицензиясынан айырылды. Қаржы нарығын реттеу және дамыту агенттігінің хабарлауынша, олардың қатарында «Ломбард «Феруна» ЖШС, «ЛОМБАРД ТУРАН.KZ» ЖШС, «Престиж 1 Ломбард» ЖШС, «Южный Ломбард» ЖШС және «Ломбард Amanat Gold» ЖШС бар.
Аталған бірнеше ломбард «Микроқаржылық қызмет туралы» ҚР заңының 16-бабы 2-тармағын орындамаған. Яғни, уәкілетті органның жазбаша нұсқамаларын жүйелі түрде орындамаған.
«Микроқаржылық ұйымдарды лицензиядан айыру туралы шешім қабылдаған күннен бастап отыз күн ішінде өзінің атауынан «ломбард» деген сөздерді немесе аббревиатураларды алып тастау арқылы қайта тіркеу рәсімін жүргізуге не қайта ұйымдастыру немесе тарату туралы шешім қабылдауға міндетті. Микрокредит беру туралы шарттар бойынша орындалмаған міндеттемелері бар микроқаржылық ұйымның (ломбардтың) клиенттері микрокредит беру туралы жасалған шарттардың талаптарына сәйкес, микроқаржылық ұйым (ломбард) алдындағы міндеттемелердің орындалуын бұзғаны үшін жауапты болады», делінген хабарламада.
Жазда агенттік төрт микроқаржы ұйымының – «Бренд ломбард» ЖШС, «Ұлдан-ломбард» ЖШС, «TIYN-S ломбард» ЖШС және «Әл-Фараби ломбард» ЖШС-ның лицензиясын үш айға тоқтатты. Сондай-ақ «Сәттілік Finance» микроқаржы ұйымының лицензиясын үш айға шектеді. Ұйым пруденциалды нормативтерді не басқа да міндетті талаптарды орындамаған.
Қазақстанда 509 ломбард бар
Ломбард бизнесі елімізге 90-жылдары енді. Кейін жағдай тұрақтала бастағанда қолданыс аясы тарылған. Себебі банктер кредит бере бастаған соң бұл жағынан бәсеке мықты болды. Бірақ соған қарамастан ломбардтардың қызметі – әлі де өзекті.
Ұлттық банктің мәліметінше, Қазақстандағы ломбардтар былтырғы ІІІ тоқсанда 7 миллиардтан астам таза пайда тапқан. Салық салынғанға дейінгі таза пайдасы 8,7 млрд теңгені құраған. Есепті кезеңде ломбардтардың кірісі 38,8 млрд теңгені, ал шағын несиелер бойынша сыйақы алуға байланысты кірістің үлесі 19,3 млрд теңге болған.
Еconomy.kz сайтының ресми дерегіне сүйенсек, 2024 жылғы 1 шілдедегі есеп бойынша елде 948 микроқаржылық ұйым жұмыс істейді, олардың ішінде 223 микроқаржылық ұйым (МҚҰ), 216 несие серіктестігі және 509 ломбард бар.
Ұйымдар санының азаюы реттеуші талаптардың қатаңдауымен және нарық құрылымындағы өзгерістермен байланысты. Атап айтқанда, биылғы жылдың екінші тоқсанында ломбарлардың саны тоғыз ұйымға азайған.
Сурет: yandex.kz
