Қазақстанда жатыр мойыны обырынан (ЖМО) қорғау үшін 11-13 жас аралығындағы 83,7 мыңнан астам қыз бала адам папилломасы вирусына (АПВ) қарсы вакцина алды. Бұл туралы Денсаулық Сақтау министрлігі хабарлады.
АПВ – жатыр мойыны обыры сияқты қауіпті аурулардың дамуына себеп болатын вирустардың бірі. Бұл вакцинация инфекциялық және онкологиялық ауруларды алдын алуға бағытталған ұлттық бағдарлама аясында қазан айында басталды.
«Қазақстанда жатыр мойыны обыры барлық жастағы әйелдердің арасында сүт безі обырынан кейін екінші орында тұр. Сондай-ақ фертилдік жастағы (25-44 жас) әйелдер өлімінің екінші себебі», — делінген хабарламада.
Қазақстанда жыл сайын 2000-ға жуық ЖМО жағдайы тіркеледі, оның ішінде 600-ден астам әйелдің өмірін сақтап қалу мүмкін емес.
Вакцинация мектептердің медициналық кабинеттерінде ата-аналардың немесе заңды өкілдердің келісімімен жүреді. Оған қоса, емханаларда да өтуге болады. Егілгендер арасында кері әсері болған жағдайлар тіркелмеді деді министрлік. Себебі әлемдік тәжірибе вакцинацияның жоғары тиімділігін көрсетіп отыр. Аурудың алдын алудың ең тиімді жолы да осы.
Папилломасы вирусының 200-ден астам түрі бар, олардың 14-і онкогенді, яғни қатерлі ісік тудыруы мүмкін. Ең қауіпті түрлері – 16 және 18 типтегі вирустар.
Денсаулық сақтау ұйымы не дейді?
Аустралия, АҚШ-та вакцинация әсерінен папиллома вирусының таралуы 90%-ға төмендеген. Әлемде жыл сайын жатыр мойыны обырынан 300 мыңнан астам әйел қайтыс болады.
ДСҰ дерегінше, АПВ-ға қарсы вакцинацияның 500 миллион дозасын қолдану теріс реакция тудырған жоқ. Денсаулық сақтау министрлігі мен Дүниежүзілік Денсаулық сақтау ұйымының мәліметінше, папиллома вирусының дәл қазір емі жоқ, алдын алудың жалғыз жолы – вакцинация.
Сурет: gov.kz
