Қазіргі уақытта киберқауіпсіздік мәселесі өршіп тұр. Адамдардың жеке деректері тез таралатын болды. Осыған байланысты eGov Mobile қосымшасы Nomad Guard сервисін іске қосты.
Egov.kz мәліметі бойынша жаңа сервис интернет-санитар қызметін атқарады:
- жиі қолданатын сайттардан деректердің таралғанын білуге болады;
- қолданушы күмәнді сілтемелерді тексеріп, қауіп бар-жоғын анықтай алады;
- сервис жария болған деректер тізімін (егер бар болса) ұсынады;
- алаяқтық фактілері туралы хабарлау тетігі пайда болды.
2024 жылы Цифрлық даму министрі zaimer.kz («МҚҰ «Робокэш.кз» ЖШС) микроқаржы ұйымынан қарыз алған тұтынушылардың 2 миллионнаннан астам жеке деректерінің таралғанын анықтады.
«Дербес деректер және оларды қорғау туралы» заңда «Дербес деректерді жалпыға бірдей қолжетімді көздерде таратуға субъектінің немесе оның заңды өкілінің келісімі болған кезде жол беріледі» деп көрсетілген.
Осы заңнама талаптары бұзылған жағдайда «Әкімшілік құқық бұзушылық туралы» кодекстің 79-бабына және 641-бабы 1-бөлігінің 1-тармақшасына сәйкес әкімшілік жауапкершілік, Қылмыстық кодекстің 147-бабына сәйкес қылмыстық жауапкершілік қарастырылған.
фото: bluescreen.kz
