Дубайда қазақстандық шенеуніктердің пәтері бар Fairmont The Palm тұрғын үй кешенің ирандық зымыран шабуылдады. Дубай қаласының әкімшілігі Dubai Media Office ақпаратты растады.
Бұл — Иранның АҚШ әскери нысандарына бағытталған қарымта шабуылы. Зымыран атқылаған кезде снарядтардың бірі Fairmont The Palm кешені маңына құлаған.
Ғимараттың бір бөлігінде қонақүй орналасқан, ал қалған екі корпусы тұрғын үй резиденциясы ретінде пайдаланылады.
C4ADS ұйымының 2022 жылы шыққан «Kazakhstan in Dubai» зерттеуінде қазақстандықтардың Fairmont The Palm кешенінен 97 пәтер сатып алғаны анықталды.
Меншік иелері қатарында Алматы облысының экс-әкімі Амандық Баталовтың жұбайы Бағдат Баталова, Жоғарғы соттың бұрынғы төрағасы Қайрат Мәмидің ұлы Мирас Мәми, Орталық сайлау комиссиясының экс-төрағасы Берік Имашевтің жұбайы Лейла Адайбекова мен ұлы Елжан Имашев бар.
Тізімде бұрынғы цифрлық даму министрі Асқар Жұмағалиевтің анасы Қайсын Жұмағалиева, ЕАЭО-дағы Қазақстан өкілі Сержан Дүйсебаев, Президент күзеті қызметінің бұрынғы қызметкері Руслан Акбердиев, генерал Ғабдулхаким Жашыбеков, бұрынғы министр Николай Родостовец және бұрынғы вице-министр Берік Толымбаевтың ұлы Ардақ Зиябек те кездеседі.
Сондай-ақ пәтер иелерірің қатарында QazaqGaz-дың бұрынғы құрылтайшысы Қайрат Шәріпбаевтың жұбайы Жанар Сейдвалиева мен қызы Корлан Шәріпбаева, Алматының бұрынғы әкімі Ахметжан Есімовтің күйеу баласы Оркен Есей, Мәжіліс депутаты Гүлжан Қарағұсованың келіні Алена Шенесары бар.
фото: СNBCTV18NEWS
