Қазақстанда дәрі-дәрмек бағасын шекті мөлшерден асырғандарға қатысты қатаң шаралар қабылданады. Бұл туралы «Түскі формат» бағдарламасында ҚР Денсаулық сақтау министрлігінің Медициналық және фармацевтикалық бақылау комитетінің бас сарапшысы Әсия Молдыманова мәлімдеді.
Дәрі-дәрмектерді шекті бағадан жоғары сатқаны дәлелденсе, кінәлілерге 500 мың теңге көлемінде айыппұл салынады. Мұндай шара дәріханалардағы заңсыз баға өсімін шектеуге және халықтың дәрілік препараттарға қолжетімділігін арттыруға бағытталған.
Айыппұл салу үшін тұтынушы дәрі мен дәріхана атауын, мекен-жайын және сатып алу туралы түбіртекті көрсетуі қажет. Шекті бағаның асырылғанын байқаған жағдайда тұтынушы Dari.kz мобильді қосымшасы арқылы дәрілердің шекті бағасын тексеріп, шағым жібере алады. Ал E-otinish порталы арқылы азаматтар онлайн арыз қалдырады.
Қазақстанда жылына екі рет Денсаулық сақтау министрлігі мен монополияға қарсы орган дәрілік заттардың бөлшек және көтерме бағасының шекті деңгейін бекітеді. 2023 жылдың 7 тамызындағы бұйрық бойынша, 6890 дәрі-дәрмек атауының шекті бағасы белгіленген.
ҚР Әкімшілік құқық бұзушылық туралы кодексінің 426-бабы бекітілген шекті бағадан жоғары сатуға тыйым салады.
Cурет: Freepik
