15 наурызға қараған түні Сырым ауданы әкімдігінің ғимаратында жанжал болғаны белгілі болды. Ресми мәлімет бойынша әкімдік күзетшісі («Миннур күзет» ЖШС) таныстарымен ішімдік ішіп, оның соңы төбелеске ұласқан.
Соның салдарынан 1981 жылғы ер адам ауруханаға түсті. Sarapshy.info редакциясының тілшісі жәбірленушінің інісімін деп таныстырған Әділжан Ізбасарұлынан оқиғаның мән-жайын сұрады. Ол оқиғаға қатысы бар күдіктіні Сырым ауданының полиция департаменті «Бала-шағасы бар» деген себеппен босатып жібергенін айтты.
«Кеше Жымпитыдағы прокуратураға барғанда, оны үй қамаққа жібергенін айтты. Сол жақтан оның зайыбы мен анасының күтіп тұрғанын, қазір балам шығады дегенін өз құлағыммен естідім», — дейді Әділжан.
Қазір Әділжанның ағасы жансақтау бөлімінде жатыр. Әділжан әкімдіктің А.есімді күзетшісімен сөйлескен. Күзетші оның ағасын Б. есімді жігіттің ұрғанын, оқиға болған жерге Сырым ауданы әкімнің орынбасары Е. Ахметов келгенін айтқан.
«Негізі менің ағам сол әкімдікте бұрын күзетші болып жұмыс істеген. Ағамның қайда тұратынын әкімдіктегілер де, әкімнің орынбасары да, күзетші де – бәрі біледі. Соны біле тұра, жеңгеме ешқандай хабар жеткізбеген. Жеңгем ауруханаға өзі барып, жансақтау бөлімінде жатқанын дәрігердің аузынан естіген. Оған дейін үйге екі полиция қызметкері келіп, ағамның жеке куәлігін суретке түсіріп алып кеткен. Тек ағамның ауруханада екенін айтқан», — дейді ол.
БҚО полиция департаменті Сырым ауданының полиция бөлімі қылмыстық іс қозғағанын хабарлады.
«1981 жылы туған ер адамға қасақана ауыр зиян келтіру фактісі бойынша қылмыстық іс қозғалды. Күдікті анықталып, уақытша ұстау изоляторына қамалды. Оқиғаға қатысушылар мен куәгерлердің барлығы анықталып, жауап алынды. Қылмыстық істің тергелу барысы бақылауда», — делінген хабарламада.
Видео: instagram.com/666nur07 парақшасынан
Мемлекеттік қызмет істері агенттігінің БҚО бойынша департаменті аталған оқиғаға мемлекеттік қызметкерлердің қатысы жоқ екенін айтты.
Statsnet сайтындағы дерек бойынша әкімдіктің күзет қызметін «Миннур Күзет» ЖШС ұйымдастырады. Компания басшысы – Миннур Сембиев. «Minnur Kuzet» ЖШС-ның кеңсесі Бәйтерек ауданының Мичурин ауылдық округінде орналасқан.
Сурет: Astana.tv
