Қазақстан халқының банктерге қарызы 2024 жылдың бірінші желтоқсандағы дерек бойынша, 35 трлн теңге болған. Бұл туралы Ratel.kz редакциясы Ұлттық банкке сілтеме жасап, хабарлады.
Бұл соманың жартысынан астамы жеке тұлғалардың үлесіне тиесілі. Ұлттық банктің мәліметінше, халықтың қарызы өткен жылдың қаңтарынан бері 3,7 трлн теңгеге өсіп, 16,6 трлн теңгеден 20,3 трлн теңгеге жеткен.
Жалпы қарыздың негізгі бөлігі ұлттық валютада рәсімделген – 30,9 трлн теңге, ал шетел валютасындағы қарыз көлемі – 4,1 трлн теңге. Елдегі жалпы қарыз 2024 жылдың алғашқы 10 айында 5,2 трлн теңгеге ұлғайды (29,8 трлн теңгеден 35 трлн теңгеге дейін).
Халықтың қарызы, соның ішінде жеке тұлғалардың банктерге қарызы — 20,3 трлн теңге, ипотекалық несиелерге 5,9 трлн теңге, тұтынушылық мақсаттарға 13,5 трлн теңге, басқа мақсаттарға 851 млрд теңге болған.
Кәсіпкерлік субъектілер банктерден 14,7 трлн теңге несие алған. Оның ішінде, шағын бизнеске – 6,8 трлн теңге, орта бизнеске – 2 трлн теңге, ірі бизнеске – 5,8 трлн теңге,
Кәсіпкерлер, әсіресе ірі бизнес субъектілері, шетел валютасындағы несиелерді көбірек пайдаланады. Бұл сегменттің үштен бір бөлігі шетел валютасында рәсімделген.
Өңірлер бойынша жағдай
2023 жылғы деректерге сәйкес, несиелердің ең көп көлемі Алматыда рәсімделген – 4,7 трлн теңге. Екінші орында Астана (2,7 трлн теңге), үшінші орында Шымкент (1,1 трлн теңге). Басқа өңірлерде несие көлемі шамамен бірдей (380–470 млрд теңге). Қарағанды облысы ерекше көзге түседі – мұнда қарыз көлемі 1 трлн теңгеге жеткен. Ең төменгі көрсеткіштер Солтүстік Қазақстан (222 млрд теңге) және Ұлытау облыстарында (155 млрд теңге) байқалады.
Несиелер бойынша мерзімі өткен төлемдер деңгейі ел бойынша төмен. 16,6 трлн теңгенің ішінде тек 397 млрд теңге немесе шамамен 2,5%-ы мерзімі өткен.
Ал халықтың депозиттер бойынша жинағы жоғары. 2023 жылдың соңында қазақстандықтардың банктердегі жинақтары 16,1 трлн теңге болған. Алматы тұрғындары депозиттер бойынша көш бастап тұр – 4,8 трлн теңге, Астана – 1,8 трлн теңге, ал Шымкент – 673 млрд теңге.
Сурет: Pixabay
