Су ресурстары және ирригация министрлігінің мәліметінше, жыл басынан бері трансшекаралық Іле өзені арқылы Қапшағай су қоймасынан Балқаш көліне 13,5 текше шақырым су жіберілген. Нәтижесінде көлдегі судың орташа деңгейі Балтық жүйесі бойынша 341,60 м-ге жеткен.
Балқаш көлінің 70%-ға жуық суы трансшекаралық Іле өзені арқылы қалыптасады. Биыл Қытаймен шекара маңындағы Добын гидробекетінен орташа су ағыны секундына 384 текше метрге жеткен. Бұл көрсеткіш өткен жылмен салыстырғанда 17%-ға артық.
Бұқаралық ақпарат құралдарында осыған дейін жазылғандай, Су ресурстары және ирригация министрлігі Қазақстан мен Қытай арасындағы трансшекаралық өзендердің суын бөлу мәселесі бойынша үкіметаралық келісім жобаларын әзірлеп жатыр. Осыған дейін министрлік өкілдері Ресей, Қытай және Орталық Азия елдерінен келген әріптестерімен трансшекаралық өзендер мәселесі бойынша 28 кездесу өткізген.
«Кездесулер нәтижесінде биыл Қапшағай су қоймасы кейінгі 10 жылда алғаш рет 18 млрд текше метрден артық су жинап, 100%-ға толды», — деп мәлімдеме жасады су ресурстары және ирригация министрі Нұржан Нұржігітов.
Сурет: massaget.kz
