Бүгін экология және табиғи ресурстар министрі Ерлан Нысанбаев Үкімет отырысында су тасқыны қауіпі жоғары аймақтарды атады.
Ол наурыз, сәуір айлары әдеттегіден жылы болатынын әрі еліміздің басым бөлігінде жауын-шашын көп түсетінін атап өтті.
Су тасқыны қаупі жоғары өңірлердің қатарында Ақтөбе, Қостанай, Қарағанды, Ақмола, Солтүстік Қазақстан, Шығыс Қазақстан облыстары және Ұлытау және Абай облыстары бар. Ал қауіптілігі орташа өңірлерге Алматы, Жетісу, Жамбыл, Батыс Қазақстан және Атырау облыстары кіреді.
«Биыл Қазгидромет алғаш рет әр облыс бойынша егжей-тегжейлі анықтамалар дайындады. Бұл анықтамаларда гидрологиялық бекеттер бойынша су деңгейінің және ағысының күтілетін ең жоғары мәндері, ағын көлемі және сондай-ақ қауіп аймағында орналасқан елді мекендерді көрсете отырып, болжамды басталу күндері көрсетіледі. Сондай-ақ өткен аптадан бастап Қазгидромет апта сайынғы гидрологиялық болжамдарды шығара бастады. Гидрометеорологиялық жағдай күрт өзгеретін болса «Қазгидромет» ескертулерді 2-3 тәулік бұрын хабарлайды», — деді Ерлан Нысанбаев.
Олжас Бектенов әкімдерге жағдайды бақылауда ұстап, халықты уақытылы хабардар етуді міндеттеді. Сондай-ақ ТЖМ толық дайын болуы керек екенін айтып, жедел штаб отырысын өткізуді жүктеді.
БҚО Төтенше жағдайлар департаменті облыс бойынша бүгінге дейін барлығы 872 000 текше метрден астам қар шығарылып, 18 000 текше метрден аса су сору жұмыстары жүргізілгенін хабарлады.
Сурет: gov.kz
