Елде теміржол билеттеріне арналған әлеуметтік жеңілдіктер тізімі кеңейтілді. Бұл туралы «Қазақстан темір жолы» Ұлттық компаниясы хабарлады.
Енді 60 жастан асқан азаматтар ел ішінде 25% жеңілдікпен қатынай алады. Ол үшін QURMET дисконт картасын рәсімдеу қажет. Картаның құны – 3000 теңге, жарамдылық мерзімі – сатып алынған күннен бастап бір жыл.
15-25 жас аралығындағы жолаушылар KETTIK33 картасын қолданып, купенің жоғарғы орындары мен отыратын вагондарға билетті 33% жеңілдікпен сатып ала алады. Оның да құны 3000 теңге, жарамдылық мерзімі – бір жыл.
Бір қызығы, жеңілдік 20-29 наурыз, 25-30 желтоқсан аралығы мен маусым-тамыз айларында қолданылмайды.
Дисконт картасын атаулы болып үшінші тұлғаларға беруге тыйым салынған. Картаны тек «Жолаушылар тасымалы» АҚ билет кассаларында рәсімдеуге болады. Ол үшін жеке куәлік, ұялы телефон нөмірі және электрондық пошта мекенжайы (міндетті емес) қажет. Жеңілдікті кассалар арқылы офлайн билет сатып алғанда немесе bilet.railways.kz сайты арқылы онлайн рәсімдеу кезінде пайдалануға болады, ал танымал билет сату сервистерінде жеңілдік қолданылмайды.
фото: ҚТЖ Press
