Шымкент әкімінің орынбасары Руслан Берденов өзіне жасалған шабуылдан кейінгі денсаулығы мен оңалту кезеңіне байланысты сот процесіне қатыса алмайтынын Facebook парақшасында мәлімдеді.
Берденовтің айтуынша, айыпталушы Ернар Жиембай тарапынан жасалып жатқан кейбір мәлімдемелер шындыққа жанаспайды.
«Соңғы рет мен оны сол күні, дәл өзі аңшы мылтығынан атып кеткен кеште ғана көрдім. Одан кейін біз еш байланыспадық», – деді әкім орынбасары өз жазбасында.
Сондай-ақ, ол Жиембайдың өкілдері «достасуға» тырысқанын, егер келісімге келсе дау тумайтынын, ал бас тартса «ақпараттық шабуыл» болатынын айтып қысым көрсетілгенін мәлімдеді.
«Дау кәсіби сипатта орын алды. Айыпталушы келісім аясындағы жұмысын толық орындаған жоқ. Мен одан тек уақтылы есеп беруді және міндеттемелерін орындауды талап еттім», – деді Берденов.
Ол Жиембай сотта айтқан «қызғаныш», «жеке қатынас», «жұбайы» деген сөздер – қоғам назарын бұру үшін жасалған манипуляция екенін айтты.
«Мен оның жұбайын да, отбасын да танымаймын. Ол мен үшін тек мердігер болатын», – деді әкім орынбасары.
Берденовтың сөзінше, қазір оның денесінде әлі 60-тан астам қорғасын оқ бар.
Сөз соңында ол өз ұстанымының өзгермейтінін, әділ сотқа сенетінін және мемлекетке адал қызмет етуді жалғастыратынын атап өтті.
Естеріңізге сала кетейік, 6 тамыз сот отырысы кезінде күдікті Ернар Жиембай бұл әрекетке оны әйеліне деген қызғаныш итермелегенін айтты.
фото: Руслан Берденовтың Facebook парақшасынан
