Кейінгі уақытта Баджо (Баджао) тайпасына қатысты ақпарат әлеуметтік желілер мен мессенджерлерде кең таралып жатыр. Бірі бұл тайпаның бар-жоғына күмән келтірсе, бірі олардың желбезегі бар дейді. Sarapshy.info редакциясы ақпаратты тексеріп көрді.
Мәлімдеме: Баджо тайпасы бар ма?
Баджо халқы шынымен де бар. Олар — теңіз көшпенділері деп аталады. Негізінен Оңтүстік-Шығыс Азияда, әсіресе Филиппин, Малайзия мен Индонезия аумақтарында өмір сүреді.
Зерттеулерге сәйкес, олар өздерінің ерекше қабілеттерімен танымал, 70 метрден астам тереңдіктегі суға өзінің табиғи салмағымен және бір жұп ағаш көзілдірікпен сүңгиді. Күнделікті уақытының 60%-ын су астында өткізеді.
Мәлімдеме: Баджо тайпасындағы адамдарда желбезек болатыны рас па?
Баджо адамдарында желбезек жоқ. Бұл — миф немесе қате түсінік. Баджао халқының ерекше қабілеттері олардың генетикалық және физиологиялық бейімделуіне байланысты, бірақ олар адамдардың анатомиялық құрылымынан ерекшеленбейді.
Баджо тайпасының ерекшелігі неде?
2018 жылы «Cell» журналында Мелисса Иллардо және оның әріптестері жүргізген зерттеу нәтижелері жарияланды. «Physiological and Genetic Adaptations to Diving in Sea Nomads» зерттеуінде Баджао тұрғынының денесі суда жүзуге, тереңдікке сүңгуге бейім екені айтылған.
Зерттеу барысында PDE10A геніндегі өзгерістер анықталған. Бұл ген көкбауырдың көлемін ұлғайтып, қанға оттегіні көбірек жинақтауға мүмкіндік береді. Ал BDKRB2 геніндегі мутация адамдардың су астында дем алмастан ұзақ уақыт тұруын қамтамасыз ететін тамырлардың тарылуын реттейді.
Сонымен қатар олардың көкбауыры басқа адамдардың көкбауырынан 50%-ға үлкен екені анықталған, бұл сүңгу кезінде қосымша оттегі қорын береді. Зерттеулерде көрсеткендей, теңіз көшпенділерінің балаларының су астында көру қабілеті жоғары. Алайда Баджо халқының өкілдерінде құлақтағы дабыл жарғақтары зақымданған болады. Бұл су астындағы қысымның өзгеруінен табиғи жолмен болуы мүмкін немесе терең сүңгулер кезінде ауырсынуды сезінбес үшін жарғақтарды әдейі теседі.
Сурет: Ашық дереккөздерден
