Батыс Қазақстан облысындағы «Подстепное-Теректі-РФ шекарасы» жолын жөндеу құны бастапқыда келісілген 21,8 млрд теңгеден 32 млрд-қа дейін қымбаттады. Бұл туралы заңгер, қоғам белсендісі Бауыржан Зәки әлеуметтік желідегі жазбасында мәлімдеді.
Мемлекеттік сатып алулар порталындағы деректерге сәйкес, «ҚазАвтоЖол» Ұлттық компаниясы «Подстепное-Теректі-РФ шекарасы» автожолының 36 шақырымын реконструкциялау бойынша «Казкомсервис» компаниясымен бірнеше келісімшарт жасаған.
Алғашқы келісімге 2022 жылдың 30 маусымында қол қойылды, оның құны — 21,8 млрд теңге. Ал 2025 жылдың 28 қазанында келісімшарт құны 32 млрд теңгеден асқан. Осылайша, жоба құны 3,5 жылда 10,2 млрд теңгеге өскен.
Қоғам белсендісінің есебінше, аталған жолдың бір шақырымына шамамен 890 млн теңге жұмсалған. 2025 жылдың 10 желтоқсанында БҚО әкімі Нариман Төреғалиев пен «ҚазАвтоЖол» Ұлттық компаниясының төрағасы Дархан Иманашев жолды салтанатты түрде ашқан. Бірақ Бауыржан Зәкидің айтуынша, мердігер компания шарттық міндеттемелерін толық орындамаған, жол сапасына қатысты бірқатар олқылықтар бар.
фото: freepik.com
