БҚО-да жеті колледж сенімгерлік басқаруға беріледі. Осыған байланысты заңгер Бауыржан Зәки облыс әкімдігі осыған байланысты қоғамдық тыңдалым өткізілген жоқ деп мәлімдеді.
2025 жылдың 24 қазаны күні премьер-министр Олжас Бектенов «Квазимемлекеттік сектор субъектілері мен мемлекеттік меншік объектілерін оңтайландырудың кейбір мәселелері туралы» №894 қаулысын қабылдаған. Осы қаулыға сәйкес кейбір нысандар жеке кәсіпкерлер немесе компаниялар иелігіне өтеді.
Анықтама:
Сенімгерлік басқарушы — құрылтайшымен (әдетте мемлекет немесе жергілікті билік органдары) сенімгерлік басқару шартын жасаған жеке немесе заңды тұлға;
Объект — мемлекеттің меншігіндегі жылжымайтын мүлік, бағалы қағаздар, жарғылық капиталға қатысу үлестері және басқа мүліктер.
БҚО қоғамдық кеңесінің мүшесі Бауыржан Зәки колледж оқытушылары мен студенттері білім мекемелерінің сенімгерлік басқаруға берілуіне қарсы екені туралы хат жазғанын хабарлады.
Сенімгерлік басқаруға берілетін колледждер тізімі:
- Құрманғазы атындағы саз колледжі (директоры – Нұржан Сертеков)
- Жоғары аграрлық-техникалық колледжі (Әсел Ғалиасқарова)
- Орал ақпараттық технологиялар колледжі (Жазира Бисалиева)
- Ж.Досмұхамедов атындағы жоғары педагогикалық колледжі (Алтынгүл Қайрлиева)
- «Сервис» технологиялық колледжі (Айгүл Искалиева)
- Орал политехникалық колледжі (Нұрболат Нұрпейсов)
- А.Иманов атындағы жол-көлік колледжі (Асан Мустафин)
- Сервис және жаңа технологиялар колледжі (Алмагүл Кдыргужина)
«Колледжді сенімгерлік басқаруға беру бірқатар елеулі кемшіліктерді тудырады. Мемлекеттің бақылауды жоғалтуы, білім берудің коммерциялануы, білім сапасының төмендеуі, мүдделер қақтығысы, мүлікті жоғалту, қаржының ашық еместігі, кадрлық тұрақсыздық, құқықтық қауіп және сенімнің жоғалуы сынды мәселелер туындауы мүмкін», – деді Бауыржан Зәки.
Заңгер облыстық білім басқармасының басшысы Елдос Сафуллинге тұрғындармен осы мәселені талқылауды талап етті.
фото: Pixabay
