БҚО-да тұмау жұқтыру көрсеткіші өткен жылмен салыстырғанда 3 есе артқан. Былтыр осы уақытта 82 жағдай тіркелсе, биыл 2024-2025 жылғы эпидемиологиялық кезеңде облыста 208 адам тұмаумен ауырған.
Бұл туралы БҚО санитариялық-эпидемиологиялық бақылау департаменті басшысының орынбасары Нұрлыбек Мұстаев өңірлік коммуникациялар қызметі өткізген брифингте мәлімдеді.
Тұмаудың эпидемиологиялық маусымында А және В типтері анықталған. А типінің 79 жағдайы (H1N1 – 73, H3N2 – 6) болса, маусым ортасына қарай B типінің 129 жағдайы тіркелген. Тұмау жұқтырған жүкті әйелдер саны – 19. 4 жасқа дейінгі балалар арасында 37, 4-15 жастағы балалар арасында 77, ересектер арасында 94 жағдай (15-29 жас – 44, 30-64 жас – 6, 65 жастан жоғары – 1 жағдай) тіркелген.
«Тұмауға қарсы 69466 адам екпе алды, бұл – облыс халқының 10%-ы», – делінген хабарламада.
Былтыр 1 қазаннан бері облыста 120 988 адам ЖРВИ жұқтырған, олардың басым бөлігі – балалар. 14 жасқа дейінгі 84 030 бала ауырса, оның ішінде 1 жасқа дейінгі 2 701 нәресте тұмауратқан. Жүкті әйелдер арасында да ауру жиілеп, 601 әйел ЖРВИ жұқтырған.
Дәрігерлер тұрғындарды сақтық шараларын сақтауға шақырады. Эпидемиологиялық жағдайға қарамастан, облыстағы білім беру және тәрбие ұйымдары карантинге жабылған жоқ.
Сурет: Pexels.com
