Батыс Қазақстан облысының Казталов ауданында еріген қар суы жолдың үстіне шығып, қозғалысты қиындатты, деп хабарлады тұрғындар.
Казталов ауданындағы «Қайыңды — Ақпәтер — Жалпақтал — Жұлдыз — Қарасу» көлік жолын су басқан. Жолдың су асып өткен бөлігінің ұзындығы 100 метрді құрайды, тереңдігі 2-5 сантиметрге дейін жетеді.
Тұрғындардың айтуынша, бұл жағдай жыл сайын қайталанады, ал жолға біраз жылдан бері асфальт төселмей келеді.
Қазір Жалпақтал-Қарасу бағытындағы қозғалыс қалпына келтірілген.
«Аталған жол бөлігі БҚО жолаушылар көлігі және автомобиль жолдары басқармасының теңгеріміне кіреді.
Қар қарқынды ерігендіктен жолдың төмен орналасқан тұстарында су жол үстіне жайылған. Жағдайға жедел ден қойған тиісті мекемелер тарапынан қажетті шаралар қабылданды. Атап айтқанда, жолға қызмет көрсететін «SSS Stroy» жауапкершілігі шектеулі серіктестігі ауыр арнайы техниканың тәулік бойғы кезекшілігін ұйымдастырды. Сонымен қатар жергілікті атқарушы орган тарапынан да кезекшілік қамтамасыз етіліп, ахуал тұрақты бақылауға алынды», — деп мәлімдеді аудан әкімдігі.
