Батыс Қазақстан облысында әйелдер мен балаларға қарсы қылмыс саны соңғы бес жылда үш есеге өсті. Бұл туралы БҚО прокурорының бірінші орынбасары Дәурен Омарғалиев мәлімдеді.
2024 жылдың тоғыз айында 2 мыңнан астам әйел отбасылық зорлық-зомбылыққа ұшыраған. Балаларға қатысты қылмыс өткен жылмен салыстырғанда 28%-ға артқан.
«Мұндай күрт өсім «ұрып-соғу» және «денсаулыққа қасақана жеңіл зиян келтіру» әрекеттерінің 2024 жылдың маусым айынан бастап әкімшілік құқық бұзушылықтан қылмыстық құқық бұзушылыққа ауысуымен байланысты», – деп түсіндірді Омарғалиев.
Дәурен Омарғалиевтың айтуынша, қылмыстың алдын алу үшін мемлекеттік органдар жеткілікті деңгейде шаралар ұйымдастырмай келеді.
«Осы жылдың 9 айында 2 мыңнан астам әйел отбасында зорлық-зомбылыққа ұшырады. Отбасындағы агрессорлардың мінез-құлқын, менталитетін және құқықтық санасын өзгерту үшін жүйелі және кең ауқымды жұмыс қажет. Бірақ мұндай шаралар жасалмайды, нәтижесінде әйелдер мен балалар зардап шегеді», – деп атап өтті ол.
Сурет: Жайық Пресс
