Қазақстандықтардың несие алуы шектен асып, халықтың қарызға бату көрсеткіші бақылаудан шыққан. Мәжіліс депутаты Елнұр Бейсембаев осылай дейді.
«Қазіргі уақытта 8 млн 400 мың қазақстандықтың несиесі бар. Бұл экономикалық белсенді жұрттың 80 пайызынан көбі банктерге қарыз деген сөз. 1,4 трлн теңгенің төлем уақыты кешіктіріліп жатыр. 1 млн 700 мың адам алған несиесін қайтара алмайтын жағдайға жеткен», – деді Елнұр Бейсембаев.
Мәжіліс депутатының айтуынша, бұл қазақстандықтардың таза табысы төмендеп кеткенін көрсетеді. Сол себепті мемлекет тарапынан шұғыл шара қолданылуы керек.
Кейінгі жылдары Қазақстан халқының шектен тыс көп кредит алуы проблемаға айналды. Бір басында ондаған несиесі бар адамдар пайда болды.
Айтып өтелік, қазір елімізде 21 екінші деңгейлі банк бар. Оның 11-і шетелдік банктің қатысуымен жұмыс істейді. Ал 8-і халықаралық банктің еншілес қаржы ұйымы.
Сурет: freepik.com
