Елде жол апаты көбейді. Бүгін бұл жөнінде бас прокурор Берік Асылов айтты. Жағдайға байланысты прокурорларға бірқатар тапсырма берілген.
Жолдағы апат 90% өсті
«Өткен жылмен салыстырғанда жолдағы апат саны 90% өсті. Жол-көлік оқиғалары құрбандарының саны да артқан. БҚО, ШҚО, Атырау, Маңғыстау, Абай, Ұлытау облыстары мен Шымкент қаласында теріс үрдіс орын алып жатыр. Осыған байланысты, прокурорларға мемлекеттік органдармен бірлесіп, ең алдымен жолдардың неғұрлым апаттық-қауіпті учаскелеріне назар аудару арқылы ЖКО-ның себептерін анықтап, нақты шаралар әзірлеуді тапсырдым», — деп жазды бүгін «Х» әлеуметтік желісіндегі парақшасында ол.
Қазақстанда жол апаты тым жиі болады
Жыл басынан бері ел аумағында 1 300 адам жол апатынан көз жұмып, 16 мың адам зардап шеккен.
Бас прокуратураның Құқықтық статистика және арнайы есепке алу комитетінің мәліметінше, 2023 жылы Қазақстанда 15 886 жол-көлік оқиғасы тіркеліп, салдарынан 1 984 адам қайтыс болған. Ал биыл мамырда Ішкі істер министрлігі жыл басынан бергі төрт-бес ай уақыт ішінде 542 адам көз жұмып, жеті мың адам әртүрлі жарақат алғанын мәлімдеген.
Шілде айында жыл басынан бері 10 мыңнан астам жол апаты тіркеліп, онда 981 адам қаза тапқаны, 12 мыңнан астам адамның жарақат алғаны белгілі болды. Бұл – жарты жылдың ғана қорытындысы.
Елімізде жол апатынан жыл сайын екі мыңға жуық адам қаза табады. Қазақстан осы алаңдатарлық статистика бойынша Орталық Азия елдері арасында – бірінші орында.
Біріккен ұлттар ұйымы бұған дейін әлемде жыл сайын 1,3 миллион шамасында адам жол апатынан қаза табатынын мәлімдеді. Оқыс оқиға салдарынан көз жұматындардың әрбір төртіншісі – жаяу жүргінші мен велосипедші. Ал жарақат алатындар – 50 миллион шегінде. Ең қызығы, өміріне қауіп төнгендердің орташа жасы 5-тен 29-ға дейін. Яғни, жастар жағы жол апатынан көбірек құрбан болып жатыр.
Сурет: freepik.com
