Қазақстандағы 59 теміржол вокзалының 54-і жөндеуді қажет етеді. Бұл туралы Үкімет отырысында көлік министрі Марат Қарабаев мәлімдеді. Қазір тек Қызылорда, Шымкент, Павлодар және Түркістан қалаларындағы вокзалдар толық күрделі жөндеуден өткен.
«Қалған вокзалдарды жөндеу бойынша қажетті техникалық құжаттар әзірленуде және қаржыландыру көздері мен механизмдері пысықталып жатыр», — дейді Марат Қарабаев.
Вокзалдардың сегізі жергілікті атқарушы органдардың басқаруында болса, қалған 51-і «Қазақстан темір жолы» (ҚТЖ) компаниясына тиесілі.
Министрдің айтуынша, теміржол вокзалдарының көпшілігі қазіргі заман талаптарына сәйкес келмейді, бұл жолаушыларға ыңғайсыздық тудырады. Осыған байланысты вокзалдарды жаңғырту және инфрақұрылымды жақсарту басты міндеттердің бірі болып отыр.
Теміржолдағы тағы бір өзекті мәселе – жылжымалы құрамның тозуы. Қарабаевтың мәліметінше, келесі жылы 226 жаңа вагон сатып алу жоспарланса, 2029 жылға дейін бұл сан 1200 вагонға дейін жеткізілмек.
Үкімет отырысында Премьер-министр Олжас Бектенов жолаушылар пойыздарының кестеден кешігу мәселесі туралы сұрады. Кейінгі уақытта азаматтардың теміржол көлігінің келу уақытын бұзуына қатысты шағымдары артқан.
«Кешігудің себебі – жөндеу жұмыстары», – дейді «Қазақстан темір жолы» ҰК» АҚ басқарма төрағасы Нұрлан Сауранбаев. Ол жағдай ерекше бақылауда екенін айтып, кешігудің себебі теміржолдарды кезекті жөндеумен байланысты екенін түсіндірді.
«Бұл жағдай жолдарды жөндеумен және жолаушылардың қауіпсіздігін қамтамасыз етумен байланысты. Соңғы 2 жылда жөндеу жұмыстарының көлемін 2-3 есеге арттырдық. Жолаушылар алдында кешірім сұраймыз және түсіністікпен қарайды деп сенеміз», – деді Нұрлан Сауранбаев.
Сурет: РЖД-Партнер
