Желтоқсанның алғашқы екі күнінде Қазақстанның мұнай және газ конденсатын өндіру көлемі 6%-ға азайды. Бұл туралы жағдаймен таныс дереккөз Reuters агенттігіне хабарлады.
Өндірістің қысқаруына Қара теңіздегі Каспий Құбыр Консорциумының (CPC) жүктеу терминалына жасалған украиналық дрон шабуылы себеп болған. Ресейдің Новороссийск портына жақын орналасқан терминалда бір айлақ нүктесі істен шығып, әдетте екі айлақты пайдаланатын нысан қазір тек біреуі арқылы жұмыс істеп тұр.
Үшінші құрылғы алдын ала жоспарланған жөндеу жұмыстарына байланысты резервке қойылды. Осыған байланысты желтоқсан басындағы өндіріс деңгейі қарашадағы орташа тәуліктік көрсеткіштен 1,9 млн баррельге дейін төмендеді. Сарапшылардың айтуынша, бір ғана айлақ нүктесін қолдану терминалдың жүктеу қуатын аптасына шамамен 900 мың тоннаға азайтады.
Бұл оқиға Қазақстан мұнай экспортындағы Каспий құбыр желісінің стратегиялық рөлін көрсетіп отыр: ел өткен жылы 68,6 млн тонна мұнай экспорттап, әлем бойынша өндірушілер арасынан 12-орынды иеленді.
фото: istockphoto.com
