Қыркүйек айының басынан бері ел аумағында үш ірі жол апатынан 25 адам қаза тапты. Бұл туралы Ішкі істер министрлігінің баспасөз қызметі хабарлады.
11 қыркүйекте Маңғыстау облысында шағын автобустың аударылуы салдарынан 10 адам көз жұмды. 14 қыркүйекте Жетісу облысында үш көлік соқтығысып, тағы 10 адам қаза тапты. Қарағанды облысында көліктің қарсы бағытқа шыққан көліктің кесірінен 5 адам қайтыс болды.
Барлық оқиға бойынша қылмыстық іс қозғалды, тергеу амалдары жүргізіліп жатыр.
ІІМ Әкімшілік полиция комитеті төрағасының орынбасары Ғалым Сарғұлов қаза болғандардың отбасына көңіл айтып, жүргізушілерді жол ережелерін қатаң сақтауға шақырды.
Құқықтық статистика порталының мәліметіне сәйкес жыл басынан бері Қазақстанда 23836 жол апаты тіркелген. Олардың 1199 (5,03%) кісі өлімімен аяқталған.
Жол-көлік оқиғалары ең көп болған аймақ — Алматы қаласы. 2025 жылдың 9 айында Алматыда 5291 апат тіркелген. Ең аз ЖКО саны Ұлытау облысына тиесілі. Бұл жерде жыл басынан бері 222 жол апаты болған.
БҚО-да қаңтар-қыркүйек айларында 875 жол-көлік оқиғасы тіркелген. Олардың 39-ы адам өліміне себеп болды. Көршілес Ақтөбе, Атырау және Маңғыстау облыстарындағы көлік апаты саны сәйкесінше 1335, 1214 және 1101-ны құрайды.
Естеріңізге сала кетейік, БҚО-да он жыл ішінде жол-көлік оқиғаларының саны үш есе көбейді. Ұлттық статистика бюросының мәліметі бойынша 2015 жылы өңірде 249 көлік апаты тіркелсе, 2025 жылы бұл көрсеткіш 697-ге дейін өскен.
Кісі өліміне әкелген жол апаты көрсеткіші бойынша Түркістан облысы көш бастап тұр: 848 ЖКО-ның 163-нің арты қайғылы аяқталған.
фото: freepik.com
