2025 жылдың қаңтар–шілде айларында Қазақстан 7,4 мың тонна алма экспорттады, бұл өткен жылмен салыстырғанда екі есе көп. Негізгі экспорттық бағыттардың қатарында Ресей, Тәжікстан, Өзбекстан және Беларусь бар. Экспорт көрсеткіші артса да, ел ішінде алма бағасы бір жылда 20%-ға жуық өскен.
Биыл Ресейге 7,2 мың тонна алма экспортталды, бұл өткен жылдың көрсеткішімен салыстырғанда 3,4 есе көп. Тәжікстанға жөнелтілген алма көлемі 1,5 есе өсіп, 23,6 тоннаға жетті. Ал Өзбекстанға экспорт керісінше 7,7 есе азайып, 175 тоннаны құраған. Биыл Қазақстан Беларуське 1,5 тонна алма экспорттаған, бұл көрсеткіш өткен жылмен салыстырғанда 24 есе төмен. Осылайша Қазақстаннан шығарылған алманың шамамен 97%-ы Ресей нарығына бағытталғаны анықталды.
2025 жылы Қазақстанға импортталған алма көлемі 1,5 есе азайды. Импорттаушы елдердің қатарында Польша – 33,6 мың тонна, Қытай – 13,6 мың тонна, Иран – 9,6 мың тонна, Өзбекстан – 6,9 мың тонна алма жеткізген.
Сонымен қатар, биыл Қазақстан алманы Оңтүстік Африка, Грузия, Франция, Нидерланд және Бельгиядан сатып ала бастады. Мысалы 2025 жылы Оңтүстік Африкадан келетін жеміс көлемі 26%-ға артқан.
Естеріңізге сала кетейік, 2025 жылдың қыркүйегінде қазақстандық Eurasian Legacy ұнының 50 тоннасы АҚШ-қа экспортталды.
Ішкі нарықтағы жағдай
Экспорт көрсеткішінің артуына қарамастан, алманың отандық нарықтағы бағасы қымбаттап келеді. 2024 жылдың тамызымен салыстырғанда дүкен сөрелерінде алма 19,7%-ға қымбаттап, келісі 843 теңгеге жеткен.
Ең қымбат баға Павлодарда тіркелді – 1000 теңге, бұл өткен жылмен салыстырғанда 29,6%-ға жоғары. Бағаның ең қарқынды өсуі Қарағандыда (+32,2%), Көкшетауда (+32,4%), Петропавлда (+32,8%) және Түркістанда байқалды.
Батыс Қазақстан облысында алманың келісі 774 теңгеге бағаланып, 20 өңірдің ішінен ең төмен көрсеткіштердің бірін құрады.
Ал Шымкент пен Қызылордада керісінше, алма бағасы сәйкесінше 1,6 және 6,8%-ға төмендеген.
фото: istockphoto.com
