Қазақстанда қыз балаларды жатыр мойны обырының негізгі қоздырғышы – адам папилломасы вирусына (АПВ) қарсы вакцинациялау басталды. Бас мемлекеттік санитардың қаулысына сәйкес, 11 жастағы қыздар жоспарлы тәртіппен вакцинациялауға жатады. Сондай-ақ 12 жастан бастап 13 жасты қоса алғандағы жастағы қыздарға толықтыра иммундау жүргізіледі.
Екпе мектептердің медициналық кабинеттерінде ата-аналардың немесе заңды өкілдерінің хабардар етілген келісімін алғаннан кейін жүргізіледі. Сондай-ақ ата-аналардың қалауы бойынша вакцинация тіркелген жердегі емханаларда да жүргізілуі мүмкін.
Мамандар жатыр мойны обырының дамуын тежейтін жалғыз әдіс вакцина екенін айтады.
Денсаулық сақтау министрлігі мәліметінше, елімізде індетті жыл сайын екі мыңға жуық адам жұқтырады. Яғни күн сайын бес адамнан анықталады. Өкініштісі сол, жылына 600-ден астам әйел осы дерттен қайтыс болады.
Ғылыми зерттеулер жатыр мойны обырының негізгі себебі АПВ инфекциясын жұқтыру екенін дәлелдеді.
Бүгінде АПВ-ға қарсы вакцина әлемнің 135 елінде, соның ішінде Қырғызстан, Өзбекстан және Түрікменстанда қолданылады. Осыған дейінгі зерттеулер бұл екпенің қауіпсіз әрі тиімді екенін көрсетіп отыр.
Еске салсақ, жыл басында вирусқа қарсы 350 000 екпе дозасы 9 млрд теңгеге сатылып алынатыны айтылды. Екпе елдегі 11 жастағы 175 мыңға жуық қыз балаға салынады. Вакцинация бағдарламасы жыл сайын тұрақты түрде жүргізілетін болады.
Сурет: pixabay.com
