Биыл Көлік министрлігі ақылы жолдардан түсетін табысты 60 млрд теңгеге жеткізуді жоспарлап отыр. Бұл туралы үкімет отырысында көлік министрі Марат Қарабаев мәлімдеді.
«2024 жылы түсім сомасы 48 млрд теңгеге жетті. Биыл қосымша 4 мың шақырым ақылы учаскені іске қосу жоспарлануда, бұл кірісті 60 млрд теңгеге дейін ұлғайтуға мүмкіндік береді. Келесі жылы бұл көрсеткіш 100 млрд теңгеге дейін өсуі мүмкін», — дейді министр.
Министрдің сөзінше, ақылы жолдардан жиналған ақшаның бір бөлігі жол құрылысына алынған қарыздың пайыздарын төлеуге жұмсалады.
Жолдарды ақылы етудің негізгі мақсаты – бюджетке көп салмақ түсірмеу және жолдардың шығынын ақтау үшін деп көрсетілген хабарламада. Осы уақытқа дейін жөндеу жұмыстары аяқталған жол учаскелерін кезең-кезеңімен ақылы жасау жалғасып жатыр. Қазір Қазақстанда жалпы ұзындығы 3,2 мың шақырым болатын ақылы жолдар бар.
Министр жол бойындағы қызмет көрсету орындарын дамыту жайы туралы айтты. Қазір елде 1 446 сервис нысаны (жанармай бекеттері, тамақтану орындары, тұрақтар және т.б.) жұмыс істеп тұр, оның 90%-ы ұлттық стандарттарға сай. 2025 жылы трассалар төңірегіне 400-ден астам жаңа, заманауи қызмет көрсету орындарын салу үшін ірі инвесторларды тарту жоспарланып отыр.
«2029 жылға дейін 60 бірлік кешенді объектілердің құрылысы жоспарланған, оның ішінде 10 бірлігі осы жылы жүзеге асырылады. Инвестиция көлемі 120 млрд теңге. Оларда жатын орын, TIR тұрағы және жанармай бекеттері қарастырылған. Жол бойы сервистік объектілерін дамытудың негізінде елімізде бірінші рет отандық қонақүйлер жүйесі және олардың франшизасы қалыптасатын болады. Бұл жол бойы объектілерінің тасымал процессімен қатар, автотуризмнің де дамуына септігін тигізеді», – деп атап өтті Марат Қарабаев.
Сурет: gov.kz
