Жаңа қызмет тегін көрсетіледі. Бұл туралы «Ұлттық ақпараттық технологиялар» АҚ хабарлады.
Қазақстан азаматтары енді несие және сақтандыру тарихын eGov Mobile мобильді қосымшасы арқылы оңай бақылайды. Жаңа «Кредиттік және сақтандыру тарихы бойынша нұсқаулық» сервисі арқылы пайдаланушы қаржылық жағдайын қадағалап отырады және несие алу мүмкіндігін анықтай алады.
Сервистің мүмкіндіктері:
Сервис екі негізгі бөлімнен тұрады:
- «Кредиттеу» бөлімі:
Бұл бөлімде пайдаланушыларға соңғы бес жылдағы несие алу тарихы туралы есеп, белсенді несие міндеттемелері туралы ақпарат және скорингтік балды көре алады.- Скорингтік балл – бұл пайдаланушының несие қабілеттілігін бағалайтын көрсеткіш.
- «Сақтандыру» бөлімі:
Пайдаланушы бұрын жасалған сақтандыру шарттары мен полистері туралы жалпы есепті көре алады. Сонымен қатар, бұл бөлімде міндетті автосақтандыру құнына әсер ететін бонус-малус класы туралы ақпарат та бар.
Сервисті қалай пайдалану керек?
Жаңа сервистің барлық функциялары тегін. Оны пайдалану үшін мына қадамдарды орындаңыз:
- eGov Mobile қосымшасына кіріңіз.
- «Басқа сервистер» → «МКБ. Кредиттік және сақтандыру тарихы бойынша нұсқаулық» бөлімін таңдаңыз.
- Жеке деректерді пайдалануға келісім беріңіз.
- Несие және сақтандыру шарттары туралы ақпаратпен танысыңыз.
- Қажет болса, кредиттік немесе сақтандыру есебін смартфоныңызға жүктеп алыңыз.
Тұтынушы назарына
Егер жеке деректер бойынша сұрақтар туындаса, пайдаланушы тікелей несие берушіге немесе сақтандыру компаниясына жүгіне алады.
Жобаның серіктестері
Бұл сервис ҚР Цифрлық даму, инновациялар және аэроғарыш өнеркәсібі министрлігі, «Мемлекеттік кредиттік бюро» АҚ және «Ұлттық ақпараттық технологиялар» АҚ бірлескен жұмыс нәтижесінде іске асырылды.
Сурет: «Ұлттық ақпараттық технологиялар» АҚ
