«Әлеуметтік желі балаларымызға зиян тигізеді, мен оларға тыйым салуды талап етемін», — деді Австралия премьер-министрі Энтони Албанес баспасөз мәслихатында.
Ол осыған дейін де балалардың психикалық саулығын сақтаудың және балалық шағын алаңсыз өткізуге жағдай жасаудың маңызды екенін айтқан.
Байланыс министрі Мишель Роуланд шектеу салынатын платформаларға Instagram және Facebook Meta, сондай-ақ ByteDance компаниясының TikTok және Илон Масктың X қолданбалары кіретінін айтты. Alphabet YouTube сайты да заңға бағынуы мүмкін, деп қосты ол.
Одан бөлек, Ресей 14 жасқа дейінгі балаларға әлеуметтік желіні пайдалануға тыйым салынуы мүмкін екенін хабарлаған болатын. Интернетте әртүрлі қауіпті ұйымдардың көбеюі және заң бойынша реттеудің жоқтығы балалар үшін алаңдауға себеп болып отыр. Сонымен қатар Ұлыбритания да 16 жасқа дейінгі балаларды әлеуметтік медиадан шектеу бойынша заң қабылдану жөнінде бастама көтерген. Елдегі министрлер мен қоғам белсенділері «Әлеуметтік желі — балалар отыратын орын емес», — деп есептейді.
Ал Қазақстанда балалардың әлеуметтік желіні пайдалануын шектеуге қатысты заң жоқ. Қоғам белсенділері, депутаттар осы жөнінде бастама көтеріп тұрады.
Осыған дейін ҚР Парламенті Мәжілісінің депутаты Ерлан Саиров:
«TikTok-тың жастарымызға рухани зияны артып келеді. Өкінішке қарай балалар TikTok арқылы тәрбиеленіп жатыр. Онда порнография, суицид және теріс контенттер осы TikTok арқылы таралуда», — деген болатын.
Бұл мәселені Сенат депутат Геннадий Шиповский де көтерген еді. Оның депутаттық сауалына ҚР Премьер-Министрі Олжас Бектенов жауап берді. Бектенов әлеуметтік желі мұқият қағаланатынын, қазіргі уақытта оларды түбегейлі шектеу жоспарда жоқ екенін хабарлады. Үкімет басшысы уәкілетті орган тұрақты негізде Tik Tok ресми өкілдігімен жұмыс жүргізетінін айтты.
— Жас пайдаланушыларды зиянды контенттен қорғау мақсатында платформа тіркелу формасын әзірледі (стандарттарға сәйкес), онда толық туған күнін көрсету қажет, өйткені TikTok 13 жасқа толмаған пайдаланушыларға арналмаған. Платформа автоматты түрде және қолмен модерациялауды қолдана отырып, көрсетілген контентті (экстремизмді, радикализмді, сепаратизмді, шектен тыс қауіпті және моральдық құндылықтарға қайшы контенттер) анықтау және шектеу үшін алгоритм әзірледі — деді Премьер-Министр.
2024 жылдың қаңтар-тамыз айлары аралығында Қазақстанда 13 жасқа толмаған 1 239 635 пайдаланушының TikTok парақшасын жойған, ал өткен жылы бұл көрсеткіш 1 842 467 болған.
Сурет: dzen.ru
