Астана қаласында 286 миллион теңгеден астам қаражатты жымқырған қаржылық пирамиданың жұмысы тоқтатылды.
Қаржылық мониторинг агенттігінің Астана қаласы бойынша департаменті «Happy Life KZ» ұйымының 2016 жылдан 2024 жылға дейін заңсыз қызметпен айналысқанын анықтады.
Күдікті биологиялық белсенді қоспалар сатамын деген сылтаумен зейнеткерлерді қаржы пирамидасына тартқан. Жаңа қатысушыларды 10%-дан 300%-ға дейін пайда табасың деп сендірген.
Қаржылық схема бойынша салым мөлшері 7 500 теңгеден 2 миллион теңгеге дейін өзгерген. Жоғары табысқа сенген салымшылардан жалпы сомасы 286 миллион теңгеден астам қаражат жиналған.
«Барлық зардап шеккендер – жеңіл табыс туралы құрғақ уәдеге сеніп қалған зейнеткерлер екенін атап өту керек, олар өз жинақтарының басқа салымшылар арасында ақша бөлу схемасының бір бөлігіне айналатынын сезбеген», — делінген хабарламада.
Күдікті қаржы пирамидасынан түскен қаражаттың бір бөлігіне 36 миллион теңгеге элиталық тұрғын үй кешенінен пәтер сатып алған.
Соттың санкциясымен аталған пәтерге тыйым салынды. Күдіктіге «ешқайда кетпеу және тиісті мінез-құлқы туралы қолхат» түріндегі бұлтартпау шарасы қолданылды.
Қазір тергеу жалғасып жатыр.
2024 жылы ҚР Қаржылық мониторинг агенттігі (ҚМА) қаржы пирамидаларын құру және басқару фактілері бойынша 68 қылмыстық істі тергеген. Пирамидалар кесірінен адамдар 20 миллиард теңгеден астам шығынға батқан. Оның ішінде 13 миллиард теңгеден астам қаражат мемлекетке қайтарылды.
Биыл ақпанның басында «QI-Trade Kazakhstan» қаржы пирамидасын құрған және басқарған Қазақстан азаматын Қырғызстаннан Қазақстанға экстрадицияланды. Ол 4,7 мыңнан астам салымшыдан жалпы сомасы 15 миллиард теңге қаражат жинаған.
Cурет: Shutterstock
