Қазақстан Республикасының Бас прокуратурасы Қырғыз Республикасынан «QI-Trade Kazakhstan» қаржы пирамидасын құрған және басқарған Қазақстан азаматын экстрадициялады. Ол трансұлттық ұйымдасқан қылмыстық топтың құрамында болған.
15 миллиард теңгені заңсыз жымқырған
Тергеу мәліметтеріне сәйкес 2017-2020 жылдар аралығында қылмыстық топ Қазақстан аумағында «QI-Trade» қаржы пирамидасын ұйымдастырып, 4,7 мыңнан астам салымшыдан жалпы сомасы 15 миллиард теңге қаражат жинаған.
Қылмыстық топтың кейбір мүшелері сот үкімімен әртүрлі мерзімге бас бостандығынан айырылса, күдіктілердің бірі қылмыс жасағаннан кейін жасырынып, халықаралық іздеу жарияланған.
Күдікті Қырғызстанда кісі өлтірген
Іздеуде жүрген азамат Қырғызстан аумағында ауыр қылмыс – кісі өлтіру әрекетін жасап, қырғыз сотымен сотталған. Қазақстан оның экстрадициясын сұрап, уақытша ұстап беруді сұраған.
Қазақстанда қаржы пирамидасын ұйымдастырғаны үшін сотталғаннан кейін, ол Қырғыз Республикасына қайтарылады, яғни екі елдегі қылмыстары үшін жазаға тартылады.
12 жылға дейін бас бостандығынан айырылуы мүмкін
Қазақстан заңнамасына сәйкес, аталған қылмыс үшін мүлкін тәркілей отырып, 12 жылға дейін бас бостандығынан айыру жазасы қарастырылған.
Бұған дейін Қазақстан Бас прокуратурасы осы қылмыстық топтың екі мүшесін Ресей мен Польшадан экстрадициялап, олар сот үкімімен әртүрлі мерзімге бас бостандығынан айырылған еді.
Сурет: gov.kz
