Елордада жеңіл рельсті көліктің (LRT) 22 шақырымдық эстакадалық жолының құрылысына қарастырылған барлық 799 тірек салынып бітті. Оған 2,5 мың жұмысшы жұмылдырылған. Бұл туралы Елорда әкімдігінің ресми сайты CTS-ке сілтеме жасап хабарлады.
53,7 мың текше метр бетон және 42 мың тонна арматура тіректерді құю үшін жұмсалды. Тіректің төменгі бөлігінің ені – 2-2,4 метр, жоғарғы бөлігі – 6,8 метр, биіктігі эстакада жолының өтетін жеріне байланысты 5-тен 18 метрге дейін, бір тіректің орташа салмағы – 200 тонна.
Қазақстандық стандарт бойынша В45 класындағы М600 маркалы бетон қолданылған.
Айта кететін жайт, В45 класындағы бетон гидроэлектростанцияларды, бекініс құрылыстарын, бункерлерді, метрополитен, ауыр металлургия кәсіпорындарын, химиялық, ғарыштық, қорғаныс зауыттарын, атом энергетикасы объектілерін салуда қолданылады.
Жоба бойынша «Нұрлы жол» вокзалынан әуежайға дейін созылатын LRT қаланың негізгі көшелерін басып өтеді. Кептелісті жеңілдететін жеңіл рейсті көліктің ұзындығы 22,4 шақырым болмақ.
LRT жайлы
Ел аузында «Жемқорлық ескерткіші» деп аталып кеткен қымбат жобаның тарихы 2005 жылдан басталады. Осыдан 19 жыл бұрын қалалық әкімдік «Астана қаласының жаңа көлік жүйесі» атауымен бағдарлама қабылдайды.
Бағдарлама бойынша құрылыс 2008 жылы басталуы керек еді. Бірақ кейінге қалдырылды. Құрылысты бастау үшін жоба 2009 жылдың төртінші тоқсанында мақұлданды. Сөйтіп 2011 жылдың 4 шілдесінде ресми түрде басталады. Бірінші кезең 2,5 жылдың ішінде салынып бітуі керек болған. Бірақ іс жүзінде жұмыс жүргізілмеді. Араға екі жыл салып, 2013 жылы құрылыс тоқтаған.
Бірақ 2015 жылдан бастап LRT бойынша келісімшарт жұмысы қайта жандана бастады. Құрылыс ресми түрде 2017 жылы басталды. Сол жылы күзден бастап белсенді түрде салына бастады.
Оның құрылысына 2023 жылы 50 млрд теңге бөлінген. Ал жалпы жобаға 600 млн доллар керек. Бұл жайлы 2023 жылдың мауысымында Астана қаласының әкімі Жеңіс Қасымбек айтқан.
Қазір LRT құрылысы үшін қанша қаржы желге ұшқанын көпшілік санамайтын да болған.
2020 жылы құрылыс кезінде болған ұрлықтарға қатысты тергеу басталды. Кейін сот процесі жүргізілді. 2021 жылы Талғат Ардан мен Қанат Сұлтанбековке іздеу жарияланды. Сол жылы жеті айыпталушы жетіден он жылға дейін бас бостандығынан айырылып, оларға 5,8 миллиард теңге көлемінде шығынды өтеу міндеттелді.
Сонымен қатар Astana LRT жобасында 257 млн доллар көлеміндегі қаржы ұрлау ісі бойынша тағы бір тергеу басталғаны белгілі болды.
Жалпы LRT-ның ұзындығы – 22,4 шақырым. Құрылыс жоспарына сәйкес, 18 аялдама бекеті салынады.
Ресми мәліметтерге сүйенсек, эстакаданы монтаждау, рельс төсеу, электрлендіру жұмысы осы жылдың соңында аяқталуы тиіс. Ал 2025 жылы сегіз станция пайдалануға берілмек. Құрылысқа қытайлық компания тартылған.
Фото: Радмир Фахрутдинов / Liter.kz
