Астана қаласының Байқоңыр ауданындағы үш қабатты ғимараттан өрт шықты. Бұл туралы Төтенше жағдайлар министрлігі хабарлады.
Өрт сөндіру жұмыстары биікте жұмыс істейтін техникалардың көмегімен жүргізілді. Өрт сөндірушілер келген сәтте ғимараттың ішкі қабырғаларының бір бөлігі қирап, жалын тез тараған. Қою түтін мен жанғыш материалдардың көптігі отты сөндіруді қиындатты.
«2025 жылғы 18 шілде күні сағат 03:05-те Астана қаласы ТЖД кезекші бөліміне хабарлама түсті. Оқиға орнына жеткен мамандар бірден үш жауынгерлік учаске құрды. Өрт аумағы нақтыланып жатыр. Сонымен қатар алғашқы бөлімшелер келген сәтте бірінші және екінші қабат арасындағы төбе плиталарының құлағаны анықталды», — деді Астана қалалық ТЖД бастығының орынбасары Қанат Алтынбеков.
Министрлік мәліметінше, өрт сағат 07:19-да ауыздықтандырылған. Қаза тапқандар мен зардап шеккендер жоқ. Тілсіз жаумен күреске 165 адам мен 62 техника жұмылдырылды.
Ғимарат әкімшілігі өрт туралы хабар бермегені белгілі болды. Өртті бірінші болып өрт сөндіру қызметкерлері терезедегі көк түтіннен байқаған.
фото: ТЖМ
