Қарағанды қаласындағы Asia FerroAlloys зауытының жұмысшылары 20 желтоқсанда наразылыққа шыққан еді. Зауыт ұжымы екі жылдан бері жалақылары өспей отырғанын, күнкөрістің қиындап кеткенін айтып ашынған. Жұма күні № 9 цехтың түнгі ауысымының қырық шақты қызметкері зауыт сыртына шығып шу көтерді. Жұмыс берушімен келісімге келмеген олар әрі қарай жұмыс істеуден бас тарты. Оқиға болған жерге Қарағанды қаласы әкімдігінің мамандары барып, оларға басу айтты. Полиция да қарауыл қойып, жағдайы бақылауға алған.
Әкімдік мамандары белсенді топ құрып, нақты талаптарын зауыт басшысына жазып берулерін ұсынған. Сол күні жұмысшылар жалақыны 50 пайызға көбейтсін және 13-ші жалақыны төлесін деген талаптарын қосып, зауыттың бас директорына ресми хат жолдады. Олардың арыз-шағымымен танысқан зауыт басшылығы дүйсенбі күні жауап бермекші болды. Осыдан кейін жұмысшылар өз жұмыс орындарына оралған еді. Алайда 21 желтоқсанда таңертең аталмыш цехтың жарты жұмыскері мәселе шешілгенше жұмыс істеуден бас тартқан.
Жұмысшылар наразылығы жексенбідеде жалғасты
22 желтоқсанда наразылығын жалғастырған жұмыскерлер басшылықтың екі жылдан бері жалақыны өсірмей келе жатқанын алға тартып, мәселені тез арада шешуді талап етті. Бүгін жұмысшылармен әкімдікпен қоса зауыттың басшылары да келіссөз жүргізді. Келіссөз зауыт ғимаратының ішінде ұйымдастырылды. Зауыт тарапы журналистерді мұнда кіргізген жоқ. Ал қала және облыс әкімдігінің баспасөз қызметі зауыттан ақпарат түскен жоқ деген желеумен үш күн бойы ешқандай мәлімет таратпады. Цех қызмектері Нұргул Хамитованың айтуынша, 22 желтоқсанда күні бойы жалғасқан келіссөз кешке қарай аяқталған.
– Кешке қарай жиналыс аяқталды, енді ғана үйге кетіп бара жатырмыз. Күні бойы осында жүрдік. Негізінен дүйсенбіні күтіңдер деген еді, оған жігіттер «Кетпейміз, жұмысқа да шықпаймыз» деп тұрып алды. Ақыр соңында басшылық жалақыны 8,5 пайызға өсіретін болды. Металл өтпей тұрғанын айтып, дәлелдер келтірді. Сонымен қатар жаңа жыл мерекесінде 100 мың теңге сыйақы беретін болды. Соған келістік, енді басқа амал жоқ. Өйткені екі жыл бойы жалақымызды көтермей келе жатыр, қымбатшылық деңгейі өсіп кетті. Ал ана жұмысқа шықпай қалған ауысым жұмысшыларының жалақысы есептеле береді , — деді Sarapshy.info-ға сұхбат берген зауыт жұмысшысы Нұргүл Хамитова.
Наразылық кезінде зауыттың үш ауысым бойынша еңбек ұжымдары жұмыс істеуден бас тартқан. Келіссөз аяқталған соң облыс әкімдігінің баспасөз қызметі жағдай тұрақталды деген ақпарат таратты. Зауыт штаттық режимде жұмыс істейді.
Зауыт қожайындары кімдер ?
Asia FerroAlloys зауытында тас көмір шығару, кокс өнімін сұрыптау, ұсақтау оны жөнелту жұмыстары атқарылады. Ферроқорытпа зауытының біржылдық өндіріс қарқыны – 57 мың тонна. Бұл зауыттың бастығы – Евгений Штеер, ал оған иелік ететін тікелей қожайындары Ерлан Нығматулин мен Давид Кемертелидзенің бақылауындағы компания Asterium Holding.
фото: asiaferroalloys.com
