Енді алаяқтар БЖЗҚ салымшыларына қоңырау соғып, алдауға көшті. Бүгін зейнетақы қоры ел азаматтарына маңызды ескерту жасады.
«Алаяқтар салымшыларға қор қызметкерлерінің атынан қоңырау шалып, БЖЗҚ-ға зейнетақы аударымдары қате жасалғандығы, сол үшін оның бөлімшесіне бару қажеттігі және SMS арқылы хабарландыру тәсілімен кезекті электрондық брондауға мүмкіндігі бар екені туралы айтады. Бұдан кейін алаяқтар телефонға келген талон нөмірін немесе кодты атап, растауды сұрайды. Осылайша олар сіздің банктік шоттарыңызға және жеке мәліметтеріңізге қол жеткізеді», — делінген қордың хабарламасында.
БЖЗҚ ескертеді
БЖЗҚ алаяқтарға алданбас үшін қырағы болып, бөгде адамдар сұраған кодты бірден айтпауды ескертеді. Сондай-ақ, кез-келген сілтемені басып, өтпеген жөн екенін айтады.
· Өз кодтарыңыз бен құпиясөздеріңізді ешкімге, ешқашан айтпаңыз
· Ақпаратты ресми арналар арқылы тексеріңіз
· Егер сізді әлдекім БЖЗҚ атынан мазалайтын болса, тұтқаны қойып, тікелей қорға хабарласыңыз
· Қаржылық және зейнетақы қызметін алу үшін көмек көрсетуге уәде беретін делдалдардың қызметтерін пайдаланбаңыз
Сондай-ақ қор ел азаматтарының барлық сауалға жауапты БЖЗҚ бөлімшелерінде, enpf.kz сайтында, БЖЗҚ/ЕНПФ ұялы қосымшасы арқылы және байланыс орталығының 1418 нөміріне қоңырау шалу жолымен алатынын айтты.
Осыған дейін Ұлттық банк алаяқтардың халықтың қалтасын қағудың жаңа тәсіліне көшкенін хабарлаған еді.
«Азаматтарды қырағы болуға және күдік туғызған қоңырауларға сенбеуге, күмәнді сілтемелерге өтпеуге, сондай-ақ бейтаныс адамдардың нұсқауымен HopToDesk, RustDesk, RUDesktop, AnyDesk, TeamViewer сияқты қашықтан басқаратын басқа да қосымшаларды орнатпауға шақырамыз», — делінген еді хабарландыруда.
Ресми мәліметке сүйенсек, интернет-алаяқтар соңғы жеті айда 7 млрд теңге жымқырған. Өкінішке орай, ел ішінде интернет алаяқтардың арбауына түскендер көбейіп отыр.
Көбіне алаяқтар онлайн сауда кезінде алдап кетеді. Ақшасын төлеп, тауарын алмаған 3 300-ге жуық адам полицияға арыз жазған. Жалған сайт, қосымшалар арқылы дербес деректерді ұрлаған 3 200-ден астам жағдай ресми тіркелген. Сонымен қатар 1 700-ден астам адамды банк қызметкері болып хабарласқан алаяқтар алдаған.
Сурет: freepik.com
