Ақтау қаласында ауыз су және кәріз жүйелерін жөндеу жұмысы жүргізілуде. Бұл туралы Маңғыстау облысының әкімі Нұрдәулет Қилыбай үкімет отырысында мәлімдеді.
Қаладағы сумен жабдықтау желілерін жаңарту жұмыстарының бірінші кезеңі аясында жалпы құны 8,9 млрд теңге болатын 18 жоба атқарылып, желілердің тозу деңгейі 11%-ға төмендеді.
«Каспий» су зауыты және МАЭК аумағында қуаттылығы тәулігіне 6 мың текше метр болатын су тұщыту қондырғысы іске қосылды. Соның нәтижесінде өңірде ауыз су көлемі тәулігіне 58 мыңнан 84 мың текше метрге дейін артқан.
Сонымен қатар Ақтаудағы кәріз-тазарту құрылыстарының қуаты 30 мыңнан 70 мың текше метрге дейін көбейді.
«Облыстың халық санының артуын ескере отырып, су тұщыту зауыттарын салу және қондырғыларын орнату бойынша 6 жобаны жүзеге асыру жоспарланған болатын. Оның ішінде құны 130,8 млрд теңгені құрайтын З жоба 2025 жылы пайдалануға берілді», — деді әкім Нұрдәулет Қилыбай.
Айта кетейік, 2025 жылдың шілде айында жарық пен сусыз қалған Ақтау тұрғындары ереуілге шығып, көлік қозғалысын тоқтатты. Қала әкімшілігі мәселені инженерлік желілердің тозуымен байланыстырды. Мамандардың айтуынша, электр желілерінің 70%-дан астамы әбден ескірген. Ал шенеуніктер бұл мәселенің бар екенін бұрыннан білсе де, жаңа тұрғын үйлердің құрылысына рұқсат берген.
фото: freepik.com
