Ақтау қаласының 1-шағын ауданында және Түпқараған ауданының «Көк Шығанақ» жағалауында жергілікті тұрғындар өлген құстарды тапқан. ҚазАқпарат агенттігінің хабарлауынша, Маңғыстау облыстық орман шаруашылығы және жануарлар дүниесі аумақтық инспекциясы бұны табиғи фактор деп бағалаған.
«Жаппай қырылу тілкелген жоқ. Мемлекеттік инспекторлар апта сайын теңіз жағалауынан құстардың табиғи өлімін тіркейді. Айта кетейік, осы жақында суда жүзетін құстардың қоныс аударуы өтті. Мыңдаған құстың арасынан әлсіздері табиғи жағдайда өлген. Оның үстіне жуырда Түпқараған ауданындағы жағалау сызығында қалың қар жауды», — деп жауап берген инспекция.
Мамандардың айтуынша, «Көк Шығанақ» – аңшылық шаруашылығы ретінде белгіленген аумақ. Мұнда 8-22 наурыз аралығында көктемгі аң аулау маусымы ресми түрде ашылған.
Еске сала кетейік, былтыр Каспий жағалауында итбалықтар қырылып қалды.
Сурет: Ашық дереккөздерден
