Ақтау қаласында кәсіпкерден 500 мың доллар бопсалаған Ұлттық қауіпсіздік комитетінің офицеріне қатысты сот үкімі шықты. Бұл туралы Маңғыстау облысының мамандандырылған ауданаралық қылмыстық істер жөніндегі соты хабарлады.
2023 жылдың тамызында офицер Денис Анкудимов пен «Ақтау халықаралық әуежайы» қызметкері Константин Алферов өңірдегі белгілі кәсіпкерден 500 мың доллар талап еткен.
Қазан айында Анкудимов кәсіпкердің жұбайына «компромат» салынған құжат жіберген. Құжат арасында кәсіпкер мен оның туыстарының жеке деректері қамтылған тоғыз беттен тұратын досье болған. Сонымен қатар кәсіпкердің салықтан жалтаруға тырысқанына қатысты жалған мәлімет көрсетілген.
26 қазанда кәсіпкер Анкудимов пен Алферов талап еткен 500 мың долларды алып келеді.
Сот үкімімен Денис Анкудимов 11 жылға, Константин Алферов 8 жылға сотталды.
фото: istockphoto.com
