Ақтау қаласының прокуроры Ерболат Әбдіров әкімшілік құқықбұзушылық жасағаны үшін кінәлі деп танылды. Ол 78 640 теңге айыппұл төлеуге міндеттелді.
Маңғыстау облыстық сотының қылмыстық істер жөніндегі сот алқасы Ерболат Әбдіровке қатысты Ақтау қаласының Әкімшілік құқық бұзушылықтар жөніндегі мамандандырылған сотының қаулысын апелляциялық тәртіппен қайта қарады.
Сот алқасы бірінші сатыдағы соттың Әбдіровтің кінәсіздігі туралы тұжырымдары негізсіз екенін анықтады.
Апелляциялық қарау барысында 2025 жылдың 27 тамызында сағат 23:00-де оның Алматы-Астана бағыты бойынша КС-955 рейсіне жолаушыларды тасымалдаған автобуста адамдарға тиіскені, қоғамдық тәртіпті бұзғаны расталды.
Әбдіровтің кінәсі әкімшілік құқық бұзушылық туралы хаттамамен, куәгерлердің айғақтарымен, әуежай мен полиция қызметкерлерінің актілері және баянаттарымен дәлелденді.
«Алқа Әбдіровтің ӘҚБтК-ның 434-бабы 1-бөлігімен көзделген ұсақ бұзақылық жасағанын анықтады. Осыған байланысты бірінші сатыдағы сот қаулысы заңсыз әрі негізсіз деп танылып, жойылды. Өйткені сот істің дәлелдемелерін толық көлемде зерттемеген және тиісті құқықтық баға бермеген. Нәтижесінде Әбдіров әкімшілік құқық бұзушылық жасағаны үшін кінәлі деп танылып, оған 78 640 теңге мөлшерінде айыппұл түрінде әкімшілік жаза тағайындалды. Сот қаулысы заңды күшіне енді», — деп хабарлады Маңғыстау облыстық сотының баспасөз қызметі.
Бұған дейін ақпарат құралдары Алматы әуежайында Ерболат Әбдіровті полиция ұстағанын хабарлаған еді. Оқиғадан кейін ол уақытша қызметінен шеттетілді.
Айтып өтелік, Әбдіров Ақтау қаласының прокуроры қызметіне 2024 жылы тағайындалды.
Фото/скриншот: Instagram/mangystau.news
