Ақтөбе облысында жол құрылысы мен жөндеу жұмыстарына жүргізілген мониторинг барысында бірқатар кемшілік анықталды. Сыбайлас жемқорлыққа қарсы қызметтің өңірлік департаменті талдау жасаған.
Атап айтқанда, биыл Мәртөк – Дмитриевка – Байторысай – Полтавка автожолы орташа жөнделді. Оған бюджеттен шамамен 600 млн теңге бөлінген. Алайда жөндеу жұмысы аяқталмай жатып, төрт шақырым жол жарамсыз болып қалған.
Мониторинг барысында жобада айналма жол қарастырылмағаны белгілі болды. Мердігер инертті материалдарды жаңа салынған жол жамылғысы арқылы тасымалдаған. Сонымен қатар мердігер компаниямен келісімшарт кезінде кепілдік міндеттемелердің мерзімі екі жыл деп бекітудің орнына тек бір жылға бекітілген.
Осы мәселелерді жою үшін Ақтөбе облысының әкімдігі орташа жөндеудің кепілдік мерзімін қайта қарап, жол жабындысын қалпына келтіру бойынша мердігерге қатысты талап арыз берді.
Әкім не дейді?
Облысы әкімі 2024 жылдың 9 айы бойынша жоспарланған жұмыстардың тек жартысы орындалғанын мәлімдеген еді. Оның сөзінше, 4440 шақырым жолды ретке келтіруге 69,5 млрд теңге бөлінген. Алайда тоғыз айда тек 491,9 шақырым жол салынып, 315,7 шақырымға асфальт төселген. Бюджеттен бөлінген 26 млрд теңгенің 10,4 млрд теңгесі игерілген. Яки қаражаттың жарты бөлігіне жетер-жетпес ақша жұмсалған.
Қарабұтақ – Комсомол – Северное жол учаскесі, Қарауылкелді – Жарқамыс және Сағашилі – Талдысай жолдарының құрылысы мерзімнен айтарлықтай кешіккен. Соның салдарынан халық жол сапасы мен құрылыстың созылуына наразылығын білдірген.
Естеріңізге сала кетейік, «Әділдік және өркендеу» қоғамдық қоры жүргізген әлеуметтік мониторинг нәтижесінде жол сапасына қатысты сауалнамаға қатысушылардың 69%-ы жол құрылысының нашар екенін айтқан еді.
Сурет: freepik.com
